12-anyos babaye angol sa aksidente

CEBU – Nabali ang tuong tiil ingon man nakaangkon og dakong samad sa ulo ang 12 anyos nga batang babaye nga tinun-an sa grade 6 sa dihang nadasmagan sa usa ka pick-up sa iyang paggawas sa eskuwelahan aron unta mopauli didto sa highway sa Bogo Central I Elementary School sa Cogon siyudad sa Bogo kagahapon sa alas 10:15 sa buntag.

Ang biktima nga gikan nga mitambong og kalingawan sa eskuwelahan apan aksidenting nadasmagan sa kolor puti nga pick-up mao si Angelica Gulfan, 12, ug nagpuyo sa Cantecson, Gairan sakop sa nahisgutang siyudad.

Samtang ang drayber sa pick-up mao si Mario Alimpos Sonido Jr., 27, minyo ug molupyo sa Guimbal lungsod sa Compostela.

Matud ni PO1 Jerry dela Cruz, traffic investigator sa Bogo City Police Station sa dihang nahinabi sa Banat News gikan sa Bogo proper ang pick-up nga gimaneho ni Sonido ug paingon unta kini sa lungsod sa Compostela.

Apan paghiabot sa maong lugar naatol usab nga migawas ang biktima sa eskuwelahan gikan nga misaksi og kalingawan aron sa pagpauli ug sa dayong tabok niini sa karsada wala makabantay si Sonido tungod usab sa multicab nga nag-parking gawas sa gate sa tunghaan ug nasalipdan ang biktima.

Subay sa inisyal nga imbestigasyon nagdagan nga mitabok ang biktima sa karsada ug naatol nga diha na sa duol ang pick-up ug atrasawo na kini sa pag-aplay og break.

Nadumbolan gyud sa bumper ang biktima ug nabagnos ang lawas niini ug nawong sa karsada nga miresulta sa dakong samad sa ulo niini ingon man pagkabali sa iyang tuo nga tiil. – BANAT NEWS