Pag-ban sa mercury medical devices gisaway

CEBU – Gisaway ni Konsehal Christopher Alix ang Health Watch Coalition (HWC) nga nagtinguha nga ma-phase-out na ang mga mercury medical devices.

Partikular na niini ang thermometer nga padayon pang gigamit sa nagkadaiyang tambalanan ingon man sa mga health centers sa tibuok kapupud-an.

Buot sa HWC nga hulipan og digital nga kahimanan ang mga mercury medical devices ilabi na diha sa publikong mga tambalanan aron mahilayo sa peligro ang mga pasyente.

Apan matud ni Konsehal Alix nga gawas nga mahal ang mga digital nga hospital equipment ug devices dili usab siya segurado sa accuracy niini.

“Well, nindot man pud nang mosagop ta sa bag-ong mga teknolohiya pero expensive na kaayo gawas ana dili ta sigurado kung unsa na ka-accurate,” matud ni Alix.

Ang awhag sa HWC gipahaum sa Administrative Order 2008-0021 sa Department of Health (DOH) alang sa hinay-hinay nga pag-phase-out sa mga mercury medical devices.

Kini tungod kay ang mercury gihulagway nga usa ka toxic chemical ug mas labing dilikado kung kini masagol sa methyl mercury.

Ang nahisgutang kemikal giingong makamatay kun masimhutan sa tawo ug makadaot usab sa panit kun mapaghiran niini.

Gikataho nga makahatag usab og dautang epekto ang mercury sa nervous, digestive, respiratory ug immune system, kidney ug uban pa.

Dugang niini, mahimo usab nga mabuta, mabungol, maparalisar, makabaton og insomnia, ug emotional instability ang tawo kung ma-expose sa mercury.

Apan matud ni Alix nga dugay nang gigamit ang mga thermometer sa nagkadaiyang tambalanan ug siya wala makadungog nga dunay namatay nga migamit niini.

“Maayo man og gikaon na nga tua ra man nang mercury sulod sa thermometer, ug kung unsafe gyud na nganong gitugotan man nga ma-produce na,” sumala ni Alix.

Ang konsehal nga maoy chairman sa Committee on Health and Hospital Services sa City Council nagduda na hinuon nga dunay laing katuyoan ang HWC sa ilang tinguha. – BANAT NEWS