Batan-on patay, minor kritikal sa pamusil

CEBU – Patay ang usa ka 21 anyos nga batan-ong lalaki ug kritikal ang kahimtang sa kauban niining minor de edad human giatngan sa tulo ka mga suspek ug gipamusil sa ilang paggawas sa diskohan sa barangay Maslog, siyudad sa Danao kagahapon sa alas 2 sa kaadlawon.

Nabungkag ang gipahigayong disko nunot sa kapistahan sa maong lugar human mahagba ang duha ka mga biktima human sa sunodsunod nga mga boto sa armas nga miresulta sa pagdinaganay sa mga mandiskohay.

Ang biktima nga dead on arrival sa Danao District Hospital mao ang usa ka Exequel Quiros, 21, ulitawo ingon man kritikal ang kahimtang sa kauban niining 17 anyos nga si George Soon Sagaysay, pulos mga molupyo sa barangay Magay, Compostela, Cebu ug igo lang nang-disco sa maong lugar.

Matud ni PO1 Nelson Pantoja sa Danao City Police Station sa dihang nahinabi sa Banat News subay sa blotter nga gibasehan niini gikan nga mitambong og disco sa maong lugar ang mga biktima ug nanggawas kini aron na unta sa pagpamauli.

Apan sa dihang nakaabot na sila sa gawas sa diskohan gisugat dayon kini sa tulo ka mga suspek nga pulos armado og mugbo nga kalibre sa armas nga wala pa matino ang kalibre dayon ang usa sa mga suspek miduol ngadto ni Sagaysay ug sa walay igong hinungdan gihapak ang nawong niini sa puan sa iyang pistola.

Miaksiyon unta og laban si Quiros apan ang laing suspek nga nagbitbit na sa armas niadtong tungora mipusil dayun kini sulod sa tulo ka higayon.

Nabungkag ang disco human nag-iyahay og panagan ang mga nangdisco ug nisibat dayon pahilayo ang tulo ka mga lalaki nga suspek bitbit ang ilang armas.

Sa pag-responde sa mga polis nakasibat na ang mga suspek ug ang mga biktima pulos na kini nagbuy-od sa yuta nga mga samaron ug dali dayon kining gihatod sa tambalanan.

Apan walay swerte si Quiros tungod kay gideklarar kini nga DOA sa mga doktor human makaangkon og duha ka samad pinusilan sa iyang kilid nga bahin sa tiyan nga gituohang milapos ang bala sa atay ug laing samad pinusilan sa walang abaga samtang ang kauban niini nga si Sagaysay nakaangkon usab og samad pinusilan sa ulo.

Hinuon daling gi-refer sa tambalanan dinhi sa dakbayan sa Sugbu si Sagaysay tungod sa seryosong kahimtang niini.

Ang kapolisan padayon pa karon sa ilang imbistigasyon sa maong nahitabong krimen ug usa sa anggulo nga ilang gitutokan nga posibleng may kalambigitan sa fraternity ang maong panghitabo. – BANAT NEWS