Giatangan gidunggab - patay sa paryente

Usa ka gipasanginlang notadong kawatan nga magpakaaron-ingnong katabang ug daghan nang nailad dinhi sa dakbayan sa Sugbu nadakpan sa mga sakop sa Theft and Robbery Section sa Cebu City Police Office niadtong miaging gabii diha sa La Guardia Lahug ning dakbayan.

Nadakpan sa TRS si Jeralyne Alad-ad, 18, temporaryong nagpuyo diha sa may sitio Santo Niño Sabellano St., barangay Quiot ning dakbayan ug lumad nga taga Dauin, Negros Oriental.

Si Alad-ad nailhan sa iyang kanhi amo diha sa barangay Lahug dihang gipagawas ang cartographic sketch niini sa pamantalaan ug telebisyon niadtong miaging adlaw.

Si Alad-ad positibong giila ug gitudlo ni Brenda Gebala amo sa maong katabang usa ka Clinical Instructor sa usa sa mga tunghaan dinhi sa dakbayan sa Sugbu ug taga Bliss, Labangon.

Si Gebala nitug-an sa mga sakop sa media nga nadala ni Alad-ad ang mokabat P200 mil   nga nagkadaiyang mahalong alahas ug gamay nalang ang na-rekober sa TRS human kini gipang-prenda.

Matud pa ni Gebala nga si Alad-ad gidawat niya isip katabang niadtong petsa 20 sa Septembre sa miaging bulan apan human sa usa ka semana gilungkab niini ang iyang lawak samtang wala sila sa panimalay.

Gibutyag niini nga ang suspetsado unang gidawat sa iyang iyaan nga dunay kan-anan sa may P. del Rosario apan walay bakante sa pagpaninda hinungdan nga didto lang una sa ilang panimalay.