Inasal Festival sa Talisay dugukon

Pagsaulog sa umaabot nga “Halad Inasal Festival” sa dakbayan sa Talisay gilaumang dugukon gihapon og mga lokal nga turista matud sa city budget officer nga si Edgar Mabunay ug project coordinator sa nahisgutang event.

Si Mabunay sa pakighinabi niini sa Banat News kagahapon sa buntag nagkanayon nga sama sa miaging tuig ang mga kalihukan nagsugod niadtong Miyerkules, Oktobre Uno. Matud niini nga ang Halad Inasal Festival ang makahatag og kauswagan sa turismo ug makahatag usab kini og dugang abot sa panudlanan sa siyudad tungod sa mga turista nga moduaw.

Gibana-bana sa project coordinator nga mokabat ngadto sa P800 mil ang budget nga magasto sa maong kasaulogan diin uban nga pundo naggikan sa mga sponsors apan wala ibutyag ni Mabunay ang kantidad nga ipagawas sa panudlanan sa siyudad.

Si Mabunay mipasabot nga ang ipahigayong street dancing atol sa Halad Inasal Festival dili usa ka kompetisyon kundili halad kini alang sa patrona sa dakbayan nga si Santa Teresa de Avila apan sama sa milabay’ng tuig dunay kompetisyon sa mga float ug gilauman nga niining tuiga   daghan pa ang mosalmot.

Si Mabunay nagkanayon nga usa sa ilang tumong nga malingaw ang mga Talisaynon ug ang mga bisita sa maong kasaulogan.

Sa laing bahin, si Konsehal Arturo Bas kinsa tsirman sa komitiba sa kahapsay ug kalinaw ug traffic commission sa pakighinabi niini sa Banat News kagahapon sa buntag mibutyag nga nangayo na sila og mga dugang polis gikan sa provincial headquarters nga temporaryong idestino sa Talisay alang sa nahisgutang kalihokan aron sa pagmentenar sa kahapsay ug kalinaw.

 Si Bucao midugang nga posibleng ang gipahigayong rota sa milabay’ng tuig mao lang gihapon ang ilang sundon.

Ang officer in charge sa Talisay City Police Station nga si Senior Inspector Jovito Canlapan sa pakighinabi sa Banat News nagkanayon nga kagahapon gikuha nila ang napulo ka polis gikan sa Regional Mobile Group (MPG) sa lungsod sa Sibonga diin ang maong mga polis ang i-augment sa Talisay hangtud sa pagkahuman sa pista samtang laing napulo usab nga naggikan sa nagkalain-laing police station sa probinsiya ang i-augment karong petsa 14-15 bisperas ug sa adlaw na sa pista.

Si Canlapan nagkanayon nga sobra sa 100 ka polis ang ipang-destino sa mga lugar sa siyudad diin ipahigayon ang mga event aron mabantayan ang mga negatibong insidente.

Ang mga tanod ang gitahasan usab sa pagtabang ngadto sa mga polis sa nahisgutang kalihokan.