Joavan Di Atrasan

Kabanay sa mga reklamante batok kang Joavan Fernandez nga miatras sa ilang kiha mihimakak nga silang tanan ang mitalaw na gyud sa pagpadayon sa kasong ilang gipasaka.

Ang amahan ni Osbert Abellana nga si Oscar nasagmuyo sa gibuhat sa pagduso og affidavit of desistance diha sa prosecutor’s office niadtong Huwebes sa hapon nila ni Mercidita Abellana ug sa pag-umangkon niining si Winston kinsa usa sa biktima sa pagpanagit ug pagpangulata nga diin si Joavan ang suspek ug mga kaubanan niini.

 Si Oscar kinsa nagdispatser sa mga taxi diha sa Tabunok gikatahong gitunolan ni   Fernandez og certification niadtong Huwebes sa hapon nga nagkanayon “the undersigned certifies that Mr. Oscar Abellana is authorized to be bona fide dispatcher in Tabunok area. This authorization is only valid until misconduct is done by the bearer. This certification goes valid until its renewal in 2009. Done this 2nd day of October, 2008, at Talisay City, Cebu, Philippines.”

 Si Oscar sa pakighinabi niini sa Banat News kagahapon sa buntag mibahad nga dili nila iatras ang kaso batok kang Joavan ug nasagmuyo siya sa gibuhat sa iyang pag-umangkon nga si Winston ug sa iyaan niining si Mercidita kinsa mipasaka sad og kasong robbery batok kang Joavan apan iyaha gihapong giatras.

Matud ni Oscar nga dihang bag-o pang nahitabo ang insidente si Mercidita pa ang nangusog pag-awhag kanila nga mopadayon gyud sa pagpasaka sa kaso.

Si Oscar ang daling miadto sa balay ni Mercidita sa sitio Kimba, barangay San Roque human niya mahibaw-i gikan sa usa ka pasahero sa taxi nga miduso og affidavit of desistance si Winston ug Mercidita.

Si Oscar mibutyag nga nahibaw-an niya gikan sa mga anak ni Mercidita nga uban kini ni Winston ug sa anak niining si “Ondong Dako” ug ni Jimmy nga ilaha ra usab nga paryente ug maoy sinaligan sa vulcanizing shop nangadto sa city hall tungod kay gipakuha sa mayor.

Nagkanayon kini dihang nabalik si Ondong Dako kini mibutyag gisaaran sila sa mayor nga sunod semana pa-eskwelahon siya og balik samtang si Winston ang patrabahoon diha sa city hall sugod kagahapong adlawa.

Pagbalik ni Oscar diha sa paradahan sa mga taxi giingong miabot ang mayor ug gitunol kaniya ang nahisgutang certification nga iya usab gipakita sa mga sakop sa media.

Matud pang Oscar giagni siya sa mayor sa mingaw nga dapit kay duna kini isulti kaniya apan iyaha kining gibalibaran maong mibiya nalang kini.

Human nakabiya ang mayor laing sakyanan na usab ang naabot kinsa ang drayber ang nangita sa manghud ni Oscar nga si “Lando” ug ang maong drayber ang nangutana kang Oscar kung amahan ba siya ni Osbert.

Ang nahisgutang drayber gikatahong buot nga moadto sa balay nila ni Oscar aron makigkita kang Osbert tungod kay patrabahoon usab kini sa city hall.

Si Oscar midugang nga wala siya motubay sa maong drayber ug mibiya siya gikan sa parada sa mga taxi aron makalikay.

Ang Banat News ang mitawag sa cellular phone ni Mayor Fernandez aron makuhaan kini sa iyang habig apan off ang cellphone niini.