Gisaka sa balay gipusil tipi

Gisaka sa iyahang payag ug gipusil-patay ang usa ka mag-uuma nga gikatahong daghan og kontra sa maong lugar tungod sa iyang batasan nga mangita og away ilabina kun makainom sa bukirang bahin sa sitio Ilaya Upper Beceril lungsod sa Boljoon kagahapon sa alas 7:00 sa buntag.

Ang biktima giilang si Celso Legara Medrano, 50, residente sa maong dapit kinsa nakit-an nalang sa iyang mga igsuon nga patay na sa iyang higdaanan sulod sa mosketiro.

Samtang ang suspek wala pa mailhi ug padayon pa ang imbestigasyon sa kapulisan pagtumbok aron pagsikop niini.

Matud ni SPO4 Cristino Uraca, officer in charge sa Boljoon Police dihang nahinabi sa Banat News subay sa gihimong pagsukit sukit sa igsoong babaye sa biktima nga si Jovita Medrano nahibulong sila kun nganong nabuntag nalang og wala gyud makapanugway sa kabaw niini ang biktima hinungdan nga iyaha kining gisusi sa payag aron pukawon apan daku nalang ang iyang kakugang nga patay na kini nga naghigda gihapon sa payag.

Daling mi-report si Medrano sa kapulisan ug sa pagsusi sa lawas niini dunay samad sa luyong bahin ang ulo niini nga maoy hinungdan sa kamatayon niini.

Sa imbestigasyon sa kapulisan alas 7:00 nianang pagkagabii gika-inom sa tanod nga si Carlito Endrana ang usa ka Bonifacio Talaman nga maoy gidungog-dungog nga kontra sa biktima sa nilabay nang mga katuigan.

Apan dihang gipatawag ug gisukit-sukit kini sa kapulisan kagahapon sa udto nihimakak kini sa kalambigitan sa maong hitabo tungod kay dugay na silang nagkauli sa maayong kabubut-on sa biktima.

Ang igsoong babaye sa biktima nga si Jovita nitug-an nga nianang pagkagabii nakadungog sila og duha ka sunod nga buto sa armas ug dangtan og pipila ka mga minutos laing usa ka buto sa armas ang ilang nadungog apan wala lang nila kini hatagi og importansya.

Ang kapulisan nakahipos usab og mga impormasyon may labot sa biktima nga kanunay makakita og away ingon man lalis ilabina sa higayon nga mahubog kini.