Video karera sa Talisay namalik

CEBU - Operasyon sa video karera sa dakbayan sa Talisay gikatahong mibalik na usab ug giingong naggikan sa usa sa mga silingang dakbayan ang operator niini.

Base sa taho nga misugod na usab karon ang operasyon sa maong mga makinang pasugalan diha sa Talisay human sa pila ka buwan nga nahilom kini.

Nasayran nga kasagarang mopusta niini mga bata ug   uban kanila makakat-on na sa pagpangawat aron lang adunay ikapusta.

Si Sr. Insp. Jovito Canlapan, officer in charge sa Talisay City Police Station sa pakighinabi niini sa Banat News kagahapon sa buntag nagkanayon nga padayon ang ilang operasyon batok sa video karera.

Apan ang mga operator sa maong mga makinang pasugalan mipahigayon og “guerilla type” nga operasyon nga ang buot ipasabot ibalhin-balhin og lugar.

Sa mga operasyon nga ipahigayon sa kapolisan walay mga operator o mga caretaker sa mga karera ang masikop.

Matud ni Canlapan nga kasagaran nga maabtan sa kapolisan sa ipahigayong operasyon ang mga makinang pasugalan na lang ug ang mga nagduwa niini ug wala nay moangkon nga mga caretaker.

Si Canlapan miingon nga kasagaran usab sa mga karera nga ilang masakmit   anha ibutang   sa payag-payag ug makadawat na lang sila og mga impormasyon.

Si Canlapan midugang nga dili sila makasayon-sayon og sulod sa mga balay sa mga gikatahapang caretaker sa mga karera tungod kay magkinahanglan pa sila og search warrant alang sa legalidad sa ilang operasyon.

Kagahapon sa buntag, 29 ka makinang pasugalan   gi-turn-over sa kapolisan sa Talisay ngadto sa provincial headquarters diin ang 25 niini ang nasakmit panahon pa sa pagka-hepe ni Supt. Romeo Perigo sa dakbayan sa Talisay ug ang upat niining nasakmit   bag-o lang sa pagka-OIC na ni Canlapan. – BANAT NEWS