Trak sa CITOM milayat sa bung-aw

CEBU - Lima ka mga kawani sa City Traffic Operation Management (CITOM) nakalingkawas sa tinong kamatayon human masangit pa sa kahoy ang ilang gisakyang dump truck nga nahagbong sa bung-aw diha sa sitio Dam barangay Buhisan ning dakbayan niadtong miaging gabii.

Ang lima ka mga kawani sa CITOM nadestino sa engineering division naglangkob nila ni Ricardo Abaes, driver sa Isuzu dump truck nga nagdala sa plakang SDC-730 milagrong nakaangkon lang og gagmay'ng mga pangos sa ilang lawas uban nila ni Chito Cabo, Ale Baguio, Benjie Gutierrez, Charley Aninipoc.

Sa imbestigasyon ni SPO4 Gumersindo Mandaue gikatahong nagdulhog ang truck sa mga biktima apan sa pag-abot sa may sitio Dam ug sa pagliko niini nawad-an og brake ang trak.

 Mibangga pa una sa poste sa Visayan Electric Company (VECO) ang trak apan natumba gihapon kini gumikan sa kakusog sa impact ug nalahos ngadto sa bung-aw.

Tungod sa mga punoan sa kahoy sa ubos nasangit ang trak ug naluwas ang mga sakay niini. – BANAT NEWS