Mosupak kun mamalik ang vendors

CEBU – Dakong supak ang mga opisyal sa barangay Santo Niño sa siyudad sa Sugbu nga pabalikon ang mga vendors sa dalan M.C. Briones diha sa ilang barangay.

Ang konseho sa barangay Santo Niño nipalabang og resolusyon nga nagpadayag sa ilang hugot nga pagsupak nga makabalik ang mga manindahay.

Temporaryong gipapahawa ang ubay-ubay nga mga vendors ilabi na diha duol sa access road sa SRP tungod sa gihimo nga drainage system.

Apan naalarma ang mga opisyal sa nahisgutang barangay nga mobalik ang mga manindahay tungod kay duna nay pipila niini ang nisugod pagtukod og mga estraktura.

Matud ni Santo Niño barangay captain Pancho Ramirez Sr., nga ang mga manindahay nakahasol sa mga motorista ilabi na diha sa access road sa SRP duol sa city hall giingong daghan ang mangagi nga mga sakyanan padulong sa siyudad sa Talisay.

“Agianan gud na paatubang sa SRP unya karon butangan na sab og laing tindahan, papahawaon gyud na sila diha,” sumala ni Ramirez.

Bugtong konswelo ni Ramirez mao ang giingong pag-uyon sa mayor sa ilang awhag nga did-an nang makabalik ang mga vendors diha sa ila kanhing nahimutangan.

“Mahimo na silang maninda sa ubang barangay pero dili diri sa barangay Santo Niño, ato gyud na silang pugngan,” nagkanayon si Ramirez.

Nanghinaut ang kapitan nga seryosuhon sa mayor ang pag-aprubar sa ilang reklamo ug pabantayan ang mga vendors nga dili makabalik diha sa nahisgutang dapit.

Nasayran nga ang apektadong mga vendors giingong mga sakop sa Cebu City United Vendors Association kon CCUVA. – BANAT NEWS