BOC-Cebu maghigpit sa Chinese products

CEBU – Cebu Customs District Collector miisa sa alert status sa adwana batok sa mga Chinese dairy products ug foodstuffs nga makasulod dinhi sa Sugbu.

Kini ang pamahayag ni Necomedic Cariño ang Chief of Staff ni Cebu Customs Collector Recardo Belmonte nga nahinabi sa Banat News human mopagawas og direktiba si BOC Commissioner Napoleon “Boy” Morales sa pagpaubos sa alert status sa tanang mga gatas nga gikan sa China.

Si Belmonte mipalapad niini sa paglakip sa tanang mga food stuffs nga gikan gihapon sa maong nasud.

Ang maong kamanduan gipakatap ni Belmonte kagahapon sa mga law enforcement units sa Customs sama sa Intelligence and Enforcement Group (IEG), Enforcement and Security Services (ESS) Customs police ug Customs Intelligence and Investigation Services (CIIS) aron mapalapdan ang pagmonitor niini nga dili makakatap ngadto sa kamerkadohan ang maong mga produkto.

Matud pa ni Cariño nga kung aduna silay pugngan nga kargamento nga gikan sa nasud sa China ila kining ipahibalo sa Bureau of Food and Drugs kon BFAD alang sa legal nga disposisyon niini.

Kalabot sa mga sapatos nga kontaminado usab sa makadaut nga chemical nga gikan gihapon sa China wala pa makadawat si Belmonte sa maong direktiba gikan ni Morales.

Kahinumduman nga ang maong mga gatas sa China nasuta nga adunay sagol nga melamine chemical nga makadaut sa panglawas sa mga kabataan ug makamatay. – BANAT NEWS