Jack naglibog

CEBU – Giangkon ni Cebu City Councilor Jack Jakosalem nga lakip siya sa nalibog sa bag-ong regulasyon nga gipagawas sa Land Transportation Office (LTO).

Kini may kalabotan sa mga lagda nga magpahamtang og multa niadtong magmaneho og motorsiklo nga mag-short pants, dili magsapatos ug uban pa.

Nakuratan ang mga nanag-iya og motorsiklo dihang kalit nga gipatuman sa LTO niadtong miaging semana ang bag-o niining polisiya.

Gani kini nakaani og mga pagsaway dili lang sa mga motorcycle owners kundili lakip na usab sa pipila ka mga opisyal sa dakbayan.

Usa na niini mao si Konsehal Jakosalem nga maoy chairman sa Committee on Transportation sa konseho sa dakbayan.

Subay niini, ang konsehal nagpadala og suwat ngadto sa rehiyonal nga buhatan sa LTO nga nag-awhag nga klaruhon niini ang bag-ong polisiya.

Matud pa ni Jakosalem nga makalibog kaayo ang balaod sa LTO kay kaniadto dili kuno pwede mag-shorts kun magsakay sa motorsiklo apan karon pwede diay basta magsapatos lang,

Lakip nga wala hisabti sa konsehal mao ang modification sa sakyanan, nga matud pa niya hastang taga LTO mismo dinhi sa dakbayan wala masayod kun unsaon nila kini pagpatuman.

Wala hinuoy pagsupak si Jakosalem sa pagpahamtang sa LTO og mas bug-at nga multa niadtong makalapas sa mga regulasyon niini.

Nasayran nga si LTO Chief Alberto Suansing mipataas na sa multa niadtong magmotorsiklo nga masakpang dili mag-helmet.

Gikan sa 150 pesos, ang nahisgutang non-moving violation gihimo na kini karon ni Suansing og usa ka libo sa tuyo nga mapugos ang mga motorcycle riders sa pagsul-ob og helmet. – Elly Bolonos (BANAT NEWS)