Biker ulo laiki patay

CEBU – Patay ang usa ka biker human moliki ang bagolbagol niini kay nadasmagan sa usa ka trak de karga samtang nagsakay sa iyang biseklita sa highway sa barangay Candaguit lungsod sa Sibonga niadtong Domingo sa alas 9:30 sa buntag.

Samtang ang de kargang Fuso Canter nga mipatay sa maong biker, nahagbong usab sa bung-aw maayo nalang kay wala mamatay ang drayber niini ug ang iyang mga kargador.

Ang biktima mao si Felman Encabo, hingkod , ulitawo, nga taga Langtad , Naga City, samtang ang drayber sa Fuso Canter nga nakadasmag kaniya mao si Basilio Saldia, hingkod , minyo, nga taga barangay Candaguit.

Si PO1 Joey Moreno sa Sibonga Police Station nga nahinabi sa Banat News nagkanayon nga gikan sa siyudad sa Naga ang biktima kauban sa laing upat pa ka mga bikers paingon sa lungsod sa Argao kay mamiyesta.

Apan pag-abot sa maong lugar mihana og liko ang biktima aron unta mobalik sa agi tungod sa nahabiling mga kauban niini apan na-atol usab nga nagsunod kaniya ang nagbaguros nga de karga hinungdan nga nadasmagan kini.

Nalabay og pipila ka metro ang biktima gikan sa iyang biseklita ug nag-una ang ulo niining mitugpa sa sementadong karsada.

Gumikan sa kakusog sa pagkabagdok, miliki ang bagolbagol niini ug mibuhagay ang daghang dugo.

Matud ni PO1 Moreno nga gisuwayan pa unta kini pagdala ngadto sa Deiparine Hospital sa Sibonga apan gideklarar kini sa mga doctor nga Dead on Arrival .

Samtang ang de karga mitugpa sa bung-aw nga may walo ka tiil ang gilawmon, human sa paningkamot sa drayber niini nga kalikayan ug dili masabak ang biktima.

Ang drayber nga si Saldia nakaangkon og mga ginagmay nga pangos sa tiil ug lawas ingon man ang duha ka truck boy niini ug bulontaryo usab kining mitahan sa kapulisan samtang nagpaabot sa tukmang kaso nga ipasaka batok niya. – BANAT NEWS