Tindahan gilungkab, sikyu gipatay

CEBU – Usa ka tindahan ang gisuwayan og lungkab ug gipatay pa ang gwardiya niini kagahapon pasado alas 12:00 sa kaadlawon diha sa dalan B. Aranas sa barangay San Nicolas.

Ang gisuwayan og lungkab mao ang NS Marketing nga gibantayan sa gwardiyang si Marlito Gelig, 36, sakop sa MESDA Security Agency taga Fiqueroa St., Taboan kinsa nakaangkon og samad dinunggaban sa walang bahin sa liog ug sampot gikan sa “ice pick”.

Matud pa ni Sr. Insp. Michael Anthony Bastes hepe sa Theft and Robbery Section sa Cebu City Police Office dihang gikahinabi sa Banat News nga sa iyang tan-aw kaila sa biktima ang mga suspeks.

Sumala pa niini, duha ngadto sa tulo ka mga suspetsado ang nihimo niini ug dako ang posibilidad nga kaila sa biktima ang mga suspetsado gumikan kay niagi kini atubangang bahin sa maong building.

Gisuwayan og bungkag sa mga suspetsado ang vault sa sulod apan nabantayan kini sa biktima maong iya kining gisitar apan giunhan ang biktima og dunggab.

Nagtuo si Bastes nga mga bagito pa ang maong mga kawatan gumikan kay dali kaayong nisibat dala ang P250 ug nagbilin og mga lama sa dugo ug mga fingerprints sa dapit.

Ang imbestigador sa Homicide Section niabag usab sa maong kaso.

Base sa report sa mga imbestigador sa kapulisan, mga impormante nibutyag nga nakadungog sila’g siyagit sa usa ka tawo nga nangayo’g pakitabang.

Apan dihang ilang gisusi nakit-an nalang nila nga nagbuy-od na sa sawog ang biktimang si Gelig nga nagkadugo ug wa nay kinabuhi. – BANAT NEWS