Tulo patay sa motor vs. bus
CEBU – Manag-inahan ingon man driver sa motorsiklo ang nangamatay human makasugat og aksidente sa kadalanan niadtong Domingo sa hapon sa National Highway Sta. Rosa barangay Poblacion lungsod sa Alegria.
Dead-on-arrival sa tambalanan sa nahisgutang lungsod mao ang driver nga si Jason Baylosis Legarte, 21, taga Lumpan barangay Moteller sa nahisgutang lungsod; Francis Vicada 9, taga barangay Lepanto, tinun-an sa Lepanto Elementary School sa nahisgutang lugar kansang inahan namatay human sa 30 minutos sulod sa tambalanan giilang si Bonifacia Vicada, 48.
Ang tulo ka mga biktima gikatahong nakaangkon og grabeng kadaot sa nagkadaiyang parte sa lawas human madaro sa usa ka Ceres Bus nga may body number 8223 gimaneho ni Sefrinio Largo, 45, barangay Poblacion lungsod sa Ginatilan.
Base sa report sa Alegria Police Station gikatahong kalit lang kining mi-left turn ang motorsiklo hinungdan nga nadasmagan kini sa naghaguros nga bus nga paingon dinhi sa dakbayan sa Sugbu.
Gumikan sa kakusog sa impact maayong pagkalagpot sa biktima ug nalukot-lukot ang motorsiklo.
Gidali pagdala ang mga biktima sa tambalanan apan nakabsan gyud sila sa ilang mga kinabuhi gumikan usab sa grabeng kadaot nga nadawat sa ilang kalawasan.
Samtang ang driver nga si Largo boluntaryo usab kining ni-surrender sa kapulisan sa maong lungsod human sa insedenti.
Si SPO2 Juan Cardona sa Alegria Police Station nga gikahinabi sa Banat News nagkanayon nga usa ka Nilla Petascia Lim nagpailang kabanay sa mga Vicada nipadayag nga dili na sila interesadong mopasakag kaso batok sa driver. – BANAT NEWS
- Latest
- Trending
