Akyat bahay gipusil

CEBU - Naangol ang usa ka sakop sa Akyat Bahay Gang (ABG) dihang gipusil kini sa security guard sa Unitop store sa Poblacion, Lapulapu City niadtong Sabado sa alas 11:00 sa gabii.

Ang biktima mao si Alfie Samonte, 19, ulitawo, nga taga barangay Bankal sa maong dakbayan samtang ang nakapusil mao si Milky Temonio, 26, ulitawo, guwardiya sa Unitop.

Si PO1 Rey Sumampong sa homicide section sa kapolisan sa maong dakbayan mibutyag sa Banat News nga nakit-an sa guwardiya ang biktima nga misuway na og katkat sa koral sa Unitop hinungdan nga iya kining gipusil .

Ang iya sa guwardiya mao ang pagpaniguro nga dili siya hiunhan sa pagpusil sa suspetsado ilabi na nga nasayran nang daan nga matag kawatan dili gyud kini mawad-an og hinagiban.

Hinuon wala gyud molampos sa pagpangawat ang suspetsado kay imbes mangawat, nadala naman hinoon kini sa tambalanan gumikan sa kadaghang dugo nga miagas sa iyang lawas agi sa mga samad pinusilan.

Matud pa ni PO1 Sumampong nga aron malibre ang kinabuhi sa biktima gidali kinig hatod ngadto sa Mandaue City Hospital apan gibalhin kini ngadto sa Vicente Sotto Memorial Medical Center sa dakbayan sa Sugbu.

Hinuon ang suspetsadong guwardiya mitahan usab dayon ngadto sa kapolisan human sa hitabo.

Nasayran sa kapolisan nga ang biktima usa ka sakop sa ABG. – BANAT NEWS