9 ka sakop sa gang gidakop

CEBU - Usa ang nakuhaan og armas sa siyam ka mga sakop sa Crips Gang nga gipanakop sa mga sakop sa Pari-an Police Station atol sa gipahigayong saturation drive diha sa barangay Lorega-San Miguel niadtong niaging gabii. Ang nakuhaan og di lisensyadong armas mao si James Villarada,19, taga Back Rubber Basak-San Nicolas ning dakbayan.

Si Villarada nasikop sa maong saturation drive nga gipanguluhan sa hepe sa maong police station nga si Sr. Insp. Bonifacio Garciano tungod sa mga report kabahin sa ilang kadudahang kalihukan diha sa maong lugar.

Nakuha   gikan sa suspetsadong si Villarada ang usa ka .38 paltik nga rebolber uban sa lima ka mga buhing bala niini ug dihang gipangitaan og mga dokumento napakyas kini sa pagpakita sa kapulisan.

Apil sa nasikop sa maong saturation drive ang laing walo ka mga kauban niini gumikan sa kalapasan sa ordinansa sa dakbayan nga paghubog-hubog.

Si SPO1 Buenaventura Ursaiz sa Pari-an Police Station nga gikahinabi sa Banat News nikumpirmar nga mga sakop gyud sa gang ang siyam ug gikataho nga anha mag-abot kada gabii sa Lorega.

Gikatakda nga pasakaan og kasong illegal possession of firearm city ordinance sa paghubog-hubog ang mga suspetsado diha sa piskaliya karong adlawa. – BANAT NEWS