Giluba-patay ginamit ang kaugalingong plamingko

CEBU - Usa ka mag-uuma ang namatay diha-diha human gitusak-tusak sa iyang silingan ginamit ang plamingko sa biktima kagahapon sa udto diha sa sitio San Isidro barangay Perrelos dakbayan sa Carcar.

Ang namatay giila sa kapulisan nga si Arnold Navoa, 54, nagpuyo sa nahisgutang lugar, nakaangkon og daghang samad sa kalawasan human dunggaba sa iyang hubog nga silingang si Gilbert Dayami, 29, ginamit ang 7 pulgadas nga plamingko sa biktima.

Si PO1 Renido Villaraiz sa Carcar Police nga gikahinabi sa Banat News nagkanayon nga sa wala pa mahitabo ang krimen ang suspetsado nanghuwan sa plamingko sa biktima gumikan kay duna kini ihawong iro.

Apan human niya matunol ang plamingko sa suspek nadunggan niini ang suspek nga duna kini “ihawong” gihinganlan niini og “Arman.”

Tungod niini daling giapas sa biktima ang suspek kinsa iyang naabtan nga nagbarog-barog sa gawas sa usa ka videokehan sa ilang dapit.

Sumala pa niini nga ang nakasaksi nakurat nalang gumikan kay ang duha maayo kaayo ang panag-estorya ug gani giagbayan pa sa suspek ang biktima.

Apan nakugang nalang sila dihang kalit nga giduslak-duslak sa suspek ang biktima sa gigunitan niining plamingko hinungdan sa hinanaling kamatayon niini.

Hinuon ang suspetsado nadakpan dayon sa ilang silingang polis nga si SPO1 Joseph Quimod ug gitanggong na sa karsel sa Carcar Police Station samtang gihikay pa ang kasong murder nga ilang ipasaka niini karong adlawa.

Nasayran usab nga gikatahong dunay pagdumot ang suspek ngadto sa biktima tungod kay niadtong niaging bulan gibunalan siya niini og plato sa ulo. – BANAT NEWS