Puya gihiktan sa liog, gibiyaan

CEBU - Usa ka puyang babaye nga gituuhang gituok pinaagi sa paghikot sa liog ang nakaplagan sulod sa usa ka bus de-pasaheroan nga magbiyahian paingon sa habagatang bahin sa lalawigan sa Sugbu niadtong niaging gabii.

Mga mananambal sa Badian District Hospital nideklarar sa maong puya nga dead on arrival human madala sa konduktor diha kanila.

Gikatahong ang maong puya kumpleto na nga tawo apan wala pa matino kung kinsa ang inahan niini nga gituuhang posibleng usa sa mga pasahero sa maong bus.

Base sa report sa Badian Police Station, ang konduktor sa Librando Bus nga si Liberto Surdilla, taga barangay Tay-tay sa nahisgutang lungsod maoy nakakita sa maong puya.

Si Surdilla nitug-an sa mga imbestigador nga gikan pa sila sa dakbayan sa Sugbu ug mga alas siete pasado sa kagabhion niadtong niaging gabii iyang nakit-an ang yellow nga plastic bag nga gibilin ug gibutang sa ikaupat nga lingkuranan.

Sa pagtuong bagahe kini sa ilang pasahero nga nalimtan iyaha kining gipunit ug gihiling ang sulod niini.

Mao nalay iyang kakugang nga batang babaye ang sulod niini nga may panaptong daw gituyo og hikot sa liog niini uban sa iyang inunlan.

Dali niyang gipahibalo ang driver ug gidali nila sa pagdala sa tambalanan apan patay na diay kini.

Ang kapulisan sa maong lungsod padayon pang nihimo og follow-up sa maong hitabo aron pag-ila kung si kinsa ang mibilin niini. – BANAT NEWS