CEBU - Usa ka menor de edad nga lalaking sakay sa iyang biseklita ang gipusil sa usa sa tulo ka mga lalaki nga kanhi mga higala nga nagsakay og motorsiklo nga iyang gikasugat sa miaging tungang gabii diha sa Cadulawan sa lungsod sa Minglanilla.
Nahiagum og duha ka samad pinusilan sa walang bahin sa abaga ug nilapos sa tuong bahin sa lawas sa biktimang tinun-an sa 4th year high school sa Bacay National High School ug molupyo sa nahisgutang lugar.
Samtang ang tulo ka mga suspek nailhan nga sila si Isagani Cabatuan, Alex Montellano, ug Michaelen Abella kinsa maoy nagmaneho sa motorsiklo pulos molupyo sa maong dapit.
Si SPO4 Remegio Elacion nga nahinabi sa Banat News sa telepono nagkanayon paingon mopalit og ice ang biktima ug gikasugat ang tulo ug pagkatungod gyud kalit lang gipusil ni Cabatuan.
Ang biktima daling gihatud sa Vicente Sotto Memorial Medical Center tungod sa samad niining naangkon.
Matud ni SPO4 Elacion atol sa ilang follow-up operation nadakpan nila si Cabatuan ug gitanggong na karon sa karsel sa Minglanilla Police Station
Sa gihimong imbestigasyon sa mga polis nasuta nga managhigala ang biktima ug ang mga suspek kaniadto apan tungod kay nagbangi kini miresulta sa pagpamusil. (BANAT NEWS)