Wa mohatag og balato gipusil

CEBU - Nalandig sa tambalanan ang usa ka lalaki nga napusilan sa mga tawong naglagot kaniya human kini makadaug sa sugal nga hantak apan wala manghatag og balato ug nidiretso og uli sa barangay Bagacay lungsod sa Sibonga niadtong Biyernes sa ala 1:00 sa kaadlawon.

Ang biktima nga nakaangkon og samad pinusilan sa iyang apapangig mao si Jeffrey Paran, minyo ug molupyo sa nahisgutang lugar samtang ang suspek mao si Rolando Alferez, nagpuyo ra usab sa maong lugar.

Matud ni SPO1 Oscar Cantay sa Sibonga Police nga maoy usa sa niresponde sa hitabo dihang nahinabi sa Banat News nakadaug ang biktima sa maong sugal atol sa pagbilar sa usa ka patay’ng silingan.

Matud sa mga saksi human makadaug sa hantak giduol siya sa mga kasugal ug sa mga pildero ug nangayo og balato apan nideretso kini pauli ug wala manghatag ngadto sa mga kauban.

Subay sa inisyal nga imbestigasyon sa kapulisan miuna dayon ang suspek diha sa balay sa biktima kinsa gikatahong naglagot kaniya.

Sa pag-abot sa biktima nanungkab kini sa kaldero ug mikaon diha sa pultahan ug ning tungura kalit nga gipusil sa suspek nga diha sa gawas nga bahin sa ngitngit nga lugar.

Daling misibat ang suspek ug dihang gisusi sa mga silingan niini ang buto sa armas nakit-an nalang ang biktima nga nagbuy-od na ug nagkatag ang kan-on sa sawog ug nagkadugo ang nawong.

Gidiretso og dala ang biktima sa Vicente Sotto Memorial Medical Center (VSMMC) dinhi sa dakbayan sa Sugbu ug sa paghimo ning balita padayun pa kining giatiman apan nasayran gikan sa kapulisan nga luwas na hinoon kini sa peligro.

Samtang ang suspek nadakpan usab dayun sa pag-responde nila ni SPO1 Cantay ug kaubanan ug nakuha gikan sa posisyon niini ang kalibre 38 nga paltik nga dunay usa ka kabhang sa bala sa cylinder niini. (BANAT NEWS)