2 patay sa dengue

CEBU - Laing duha ka kinabuhi ang nakalas sa duha ka barangay sa dakbayan sa Sugbu niining buwana human matakbuyi sa sakit nga dengue.

Usa niini mao ang 19 anyos nga lalaki nga taga barangay Guadalupe samtang 6- anyos nga molupyo sa sitio Mohon, Tisa ning siyudad ang ikaduha.

Sa kasamtangan, ang City Epidemiology Surveillance and Statistics Unit (CESSU) sa City Health Department nakatala na og 970 ka dengue cases sukad sa Enero hangtud niadtong Septembre 20.

Duna nay 39 ka tawo ang namatay wala pay labot ang 6-anyos nga lalaki nga nakalas niadtong Septembre 22.

Ang dengue coordinator sa siyudad nga si Dorenda Macasucol hinuon padayong nangangkong nius-os ang dengue cases sa dakbayan.

Sa buwan sa Septembre niadtong miaging tuig, ang CESSU nakatala og 319 ka dengue cases samtang niining buwana (hangtud sa Septembre 20) duna lay 38 ka kaso.

Matud ni Macasucol nga ang pagpadayon sa nasugdang kampanya sa dakbayan batok sa dengue maoy nakapaminos sa mga kaso sa dengue sa siyudad.

Partikular nga gitumbok ni Macasucol mao ang pulong-pulong sa kabarangayan pag-edukar og mist spraying sa mga molupyo labot sa dengue uban kang Mayor Tomas Osmeña.

Sa pikas bahin, pabilin gihapon nag-una ang barangay Guadalupe sa labing daghan og kaso sa dengue sa siyudad nga dunay 65 ka kaso ug 3 na ang patay. (BANAT)