Tawhanong katungod tahuron - Inserto

CEBU - Ang pangulo sa Central Command Lt. Gen. Pedro Ike Inserto nipahimangno sa iyang mga sakop nga trataron og maayo ang ilang mga madakpan nga mga sakop sa rebeldeng New Peoples Army.

Kini maoy gipadayag ni Inserto sa mga sakop sa media subay usab sa nagpadayon karong operasyon sa militar sa Negros nga nigukod sa mga rebeldeng komunista.

Sumala pa niya hatagan og tukmang ‘humanitarian considerations’ ang mga dinakpan samtang pahibaw-on ang mga ginikanan sa ilang madakpang NPA.

Tulo ka gidudahang amasonang NPA sa miaging adlaw ang nadakpan sa mga sundalo diha sa sitio Mansuban-on barangay Manlokahoc, Sipalay Negros Occidental. Ang tulo gidudahang miyembro sa Kilusang Larangang Southwest-Negros nga giilang sila si Meralyn P. Mahinay “alias Angel” 20, usa ka 4th year high school sa Ramon Magsaysay High School sa Cubao, Quezon City apan lumad nga taga sitio Balaringan, barangay Manlukahok, Sipalay City nga giingong nalambigit sa pag-organisa, pangaylap og pundo, gamit ug propaganda og nasakop sa NPA niadtong Pebrero 19, 2007.

Laing nadakpan mao si Rubelyn G. Aba “alias Geya” 22, 2nd year high school taga sitio Singarongan, barangay Camindangan. Sipalay City sakop sa Squad 2, platoon 1-Baking- Grupong Pang-Organisa ug nasulod sa NPA niadtong Septembre 8 ning tuiga; samtang ang ikatulo mao si Roseby F. Cañete “alias Ayna” 19, taga sitio Sadlum barangay Camindangan, Sipalay City, finance, logistic ug mess officer sa ilang pundok.

Ang inahan ni Mahinay nga si Elizabeth Mahinay gitugutan nang makahinabi ang anak diha sa Bravo Company 61st IB sa barangay Manlukahok diin siya gipahibawo sa nasudlan sa iyang anak.

Samtang gipahibalo ni Inserto nga laing binakbakay ang nahitabo alas 10:00 pasado sa buntag kagahapong adlawa tali sa tropa sa 79th Infantry Battalion sa sitio Bagacay barangay Milagrosa, Sta. Catalina, Negros Oriental.

Usa ka civilian volunteer ang naangol sa maong sinukliay sa bala. Mao na kini ang ika-13 nga encounter sa militar ug mga rebelde sukad ilang gisugdan ang pagpuhag sa maong grupo diha sa Negros.

Samtang gihagit usab ni Inserto si bokal Victor Maambong sa pagtungas sa kabukiran sa Negros aron usab makahimog kaugalingong imbestigasyon human kini nipadayag nga may pagduda sa operation sa militar.

Matud pa niini nga angayang motungas si Maambong sa bukid aron usab makapalabang kini’g laing resolusyon labot na sa tinuoray’ng sitwasyon sa lugar diin ang mga sundalo nibuhis sa ilang kinabuhi pagpanalipod sa nasud batok sa mga rebeldeng komunista.

Samtang gihagit usab niya ang mga sakop sa Karapatan nga motabang usab sa mga samaron nilang mga sundalo nga naa pa karon sa mga tambalanan ug motabang sa paggukod sa mga rebelde kini kun tinuoray’ng mga independent nga individual ang nag-imbestigar sa tawhanong katungod. (BANAT)