Uyoan gitigbas sa pag-umangkon

CEBU - Hapit maputol ang ulo ug nababha ang bukobuko sa patay'ng lawas sa usa ka uyoan human giunay og tigbas sa iyang kaugalingong pag-umangkon gamit ang hait nga sundang sa sitio Calumpang barangay Dalinding lungsod sa Daanbantayan niadtong Miyerkules sa alas 5:00 sa hapon.

Ang biktima nga namatay diha-diha mao si Marcelino Rosacenia, residente sa nahisgutang lugar samtang ang suspek mao ang iyang pag-umangkon nga si Ritchie Rosacenia Punay, 27, ug silingan ra sa uyoan nga biktima.

Matud ni PO3 Mamerto Gastador sa Daanbantayan Police dihang nahinabi sa Banat News ang suspek boluntaryong nitahan kanila human sa hitabo.

Matud pa sa suspek buot lang siya manimawos sa pagkulata kaniya sa iyang uyoan sa nilabay'ng semana.

Gikatahong wala siya mahibawo nganong gikulata siya niini ug niadtong tungura wala siya makabawos ug niadtong tungura dihang nakahigayon siya nga wala makabantay ang biktima diha gawas sa ilang balay iyaha dayun kining gitigbas gamit ang sundang.

Maayong pagkaigo sa bukobuko sa biktima sa unang pagtigbas niini ug buot unta kining modagan hinungdan nga giusban niya og tigbas ug subling naigo sa bukobuko.

Dihang niaksyon na og katumba giusban niya og tigbas ang tangkugo niini hinungdan nga diriyot nga mabuwag ang ulo niini gikan sa lawas.Nag-ubo na nga nagkadugo ang biktima sa crime scene human sa hitabo ug gibiyaan dayon sa suspek.

Apan paglabay sa usa ka oras kapin boluntaryo kining nitahan sa iyang kaugalingon ngadto sa barangay konsehal nga si Joseph Pilapil ug nagpahatod sa kapulisan.

Ang suspek nagtingkagol na karon sa detention cell sa kapulisan samtang giasikaso ang kasong ipasaka batok kaniya samtang nagpaabot sa mga kabanay sa biktima nga nag-asikaso pa pagpahiluna sa patay'ng lawas. (BANAT)