Ordinansa batok sa sugarol nga brgy. officials sa Adlaon giumol

CEBU - Mga opisyales sa barangay nga nagpunay og sugal buot nga masilutan sa ilang barangay kapitan pinaagi sa pagpalabang og ordinansa nga magmulta niini ug pagkatangtang sa katungdanan.

Ang barangay kapitan sa Adlaon nga si Nieves Narra gikatahong nasagmuyo nga dunay mga pipila sa mga kagawad sa barangay ang nalambigit sa mga sugal.

Nunot niini ang kapitana uban sa pag-uyon sa pipila ka konsehal nipalabang og ordinansa nga nagdili na sa pagpanugal.

Multa nga P200, P400 ug pagkatangtang sa katungdanan ang silot nga ipahamtang ngadto sa mga barangay tanod nga masakpang nanugal.

Samtang P500, P1,000 ug P1,500 usab ang multa nga ipahamtang ngadto sa sugarol nga mga konsehal sa barangay kung masakpang nakalapas sa ordinansa.

Upat ka mga konsehal sa barangay Adlaon gawas sa pipila ka mga tanod ang giingon ni kapitan Narra nga mga sugarol ug kanunay'ng mag tong-its ug hantak atol mismo sa ilang duty ug parisan og tagay og ilimnong makahubog.

“Makapila na nako sila badlonga pero dili man mopatoo, mobalik man gihapon, mao nga nakahuna-huna ko pagpalabang og ordinansa,” sumala ni kapitan Narra.

Wala hinuon did-i ang mga opisyal sa pagsugal basta di lang oras sa tingtrabaho matud pa niini.

Hangtud sa pagsuwat ning balita, padayon pa nga gitun-an sa Committee on Laws sa City Council ang nahisgutang ordinansa sa barangay Adlaon.

Kung walay makita nga babag ang konseho sa dakbayan niini, mahimo na nga ikapatuman sa nahisgutang barangay ang ilang ordinansa. – BANAT NEWS