3 Amasonang NPA Nadakpan

CEBU - Samtang usa ka sundalong taga Pinamungajan dinhi sa Sugbu ang nasamdan atol sa engkwentro sumala pa sa tigpamaba sa Central Command nga si Major Christopher Tampus.

Si Tampus tigpamaba nga nahinabi sa telepono sa Banat News miila sa samarong sundawo mao si PFC Recto Moboayaen Jr. lumad nga taga barangay Pandacan sa lungsod sa Pinamungajan ug sakop sa 61st Infantry Battalion sa Philippine Army.

Matud ni Tampus nagsugod ang 25 minutos nga engkuwentro alas 7:30 kagahapon sa buntag sa nahisgutang dapit tali sa 61st IB nga gipangulohan ni Lt. Mc Gary Dida sa dili mominus 17 ka mga gidudahang sakop sa NPA nga nasigpatan sa militar.

Narekober sa militar ang usa ka MI6 rifle nga gituuhang iya sa mga rebelde nga gibiyaan sa dapit human kini mosibog lakip na lima ka mga backpacks, tulo niini gikatahong gikan sa tulo ka gidudahang amasona nga may mga sulod nga combat provisions sama sa bawon, mga sinina, medical kits, mga subersibong dokumento nga gipamutos og plastic aron di mabasa.

Matud pang Tampus gi-turn-over na ang tulo (mga pangalan gipugngan sa Banat News) ngadto sa kapolisan sa Sipalay City alang sa imbestigasyon.

“Suspected NPA ni sila tungod sa ilang mga backpacks nga may mga subversive documents, pero kay di man sila armado pagkakita sa ila diha sa encounter site gidakop lang sila kay nagsunod man ta sa rules of engagement ug ilang tawhanong katungod,” asoy pang Tampus apan mibutyag nga ang presensya palang nila diha sa bukid diin mahitabo ang engkwentro ug ingon man sa ilang mga dala nagduda silang mga rebelde ang tulo.

“We are certain that these group are part of the group of NPA rebels in Dauin, Negros Oriental,” dugang pa ni Tampus. Ang Dauin ug Sipalay sumala pang Tampus mahimong lakwon sulod sa tulo ka adlaw.

Samtang ang samarong sundalo nga si Moboayaen naigo sa walang tuhod ug hawak ug giatiman na sa tambalanan sa Kabangkalan Hospital alang sa dugang pag-atiman sa mga doktor.

Si Lt. General Pedro Ike Inserto Commanding sa Central Command mipadala og duha ka Huey Helicopters ug duha ka eroplano sa Philippine Air Force aron abagan ang 61st IB sa hot pursuit operation.

Hinuon giawhag ni Inserto ang iyang mga sakop pagtamod ug pag-obserbar sa rules of engagement ug “absolute respect to human rights.”

Matud ni Tampus nimando si Inserto nga mopahigayon og way hunong nga opensiba batok sa NPA.

Matud pang Tampus kabahin sa grupo ni Roy Erecre ang naka-engkwentro sa 61st IB tungod kay ang lugar nga nahitaboan sakop kini sa South East Negros kinsa si Erecre maoy lider sa Seksyon Sentral Bisayas- Regional Party Committee. - Uban sa report ni Rey Pasaporte (BANAT NEWS)