Gipatay atol sa birthday

CEBU - Nabungkag ang usa ka birthday party human gipatay ang usa ka 16-anyos nga lalaki sa wala mailhing suspek samtang nagselebrar sa maong okasyon sa bukirang bahin sa barangay Tupas lungsod sa Ronda niadtong Lunes sa alas 8:45 sa gabii.

Ang biktima giilang si Richard Caday 16, kinsa naglingkod sa lantay’ng kawayan sa terasa sa pinuy-anan sa pamilyang Nelson Landisa kansang 3-anyos nga anak maoy nag-birthday dihang kalit nga gipusil.

Ang biktima gikatahong nagkaon niadtong tungura samtang ang ubang bisita nag-inom ug nagkanta sa videoke ug wala makabantay sa mamumuno nga mipahipi diha sa ngitngit nga bahin gawas sa balay.

Matud ni PO1 Josephus Faunillan dihang nahinabi sa Banat News naigo ang biktima diha sa bukobuko ug nilapos sa walang dughan, tungod sa hitabo nabungkag ang maong party.

Sa paghimo ning balita pabilin pang blangko ang mga pulis sa motibo sa krimen sanglit wala pay bisan usa ka saksi ang nipatin-aw. – BANAT NEWS