CEBU - Pabor si Cebu City Councilor Joey Daluz sa balaudnon nga gipalabang ni Palawan representative Abraham Mitra nga mag-amendar sa Section 150 sa National Internal Revenue Code of 1997.
Ang gipasabot ni Daluz mao ang House Bill 5039 sa kongresista nga magpatong og 20% nga excise tax sa tanang non-alcoholic drinks.
Partikular na niini ang mga softdrinks, carbonated bottled water, energy drinks ug bisan gani ang isotomic drinks nga gituohang maoy hinungdan sa pipila ka mga sakit.
Kini ilabi na sa diabetes, bone fractures, hyperacidity, tooth decay, sakit sa kasing-kasing ug uban pang mga balatian.
Gitataw ni Daluz nga mas maayong ang mga palaliton nga wala kaayo kinahanglana sa katawhan maoy patas-an og buhis kay sa nag-unang palaliton.
Ang konsehal nga maoy chairman sa Committee on Budget and Finance sa City Council miingon nga usa ka maayong lakang ang pagpalabang sa maong balaudnon.
Apan midugang hinoon si Daluz nga mas maayong klaruhon ni Mitra kung unsay gastohan sa mahipos unya nga buhis kung mahingpit nang balaud ang proposal niini.
Gibana-bana sa kongresista nga mokita og dugang P5 bilyones ang gobyerno kung mahingpit nang balaudnon ang iyang proposal.
Gawas niini gituohan usab ni Mitra nga mominos ang moinom og mga softdrinks nga walay maayong mahatag sa panglawas sa tawo.
Kini gidasunan ni Daluz, apan duna hinooy punto nga gikabalak-an ang konsehal nga giingong nanginahanglan usab og pagpasabot sa proponent.
“Nindot man na nga balaudnon pero mas maayong klaruhon una na kung asa paingon ug unsay dapatan sa kwarta kung mahimo nang balaud kay lisod kaayo kung adto unya na mapunta sa bulsa sa ubang mapahimuslanong naa sa gobyerno, klaruhon gyud kung gamiton ba na sa mga nasakit og diabetes o unsa ba,” sumala ni Daluz.
Kung mahatagan og igong pagpasabot sa kongresista ang katawhan labot sa proposal niini, wala makakita og rason si Daluz nga kini makasugat og mga pagsupak. – BANAT NEWS