Lalaki giliog pagduslak patay

CEBU - Gituhog sa wala matinong mahait nga hinagiban ang liog sa usa ka 36-anyos nga lalaki hinungdan sa hinanaling kamatayon niini kagahapon sa kaadlawon diha sa Puntod Alaska Mambaling ning dakbayan.

Ang namatay giila sa kapulisan nga si Marcelino Raga Domen, nagpuyo sa nahisgutang lugar.

Base sa imbestigasyon nila ni SPO4 Alex Dacua ug mga kaubanan sa Homicide Section sa Cebu City Police Office usa ka vendor sa nahisgutang lugar maoy nakakita sa maong hitabo.

Gikataho nga mga alas 2:55 kagahapon sa kaadlawon ang biktima naglakaw sa nahisgutang dapit ug may usa ka wala mailhing tawong nagsunod kaniya.

Nakugang nalang ang vendor dihang kalit nga gidunggab sa maong tawo ang biktima gikan sa luyo ug nagdaling midagan pasulod sa sitio Huyong-Huyong ug gibiyaan ang biktima nga nagkisi-kisi diha sa dalan.

Ang kapulisan padayon pa nihimo’g dugang imbestigasyon sa maong insidente aron pag-ila sa suspek ug matino kun unsay motibo sa maong pagpanunggab. – BANAT NEWS