Mga Patay Nangadugta

CEBU - Naglisod sa pag-ila ang mga kabanay sa mga patay’ng lawas nga miabot kagahapon dinhi sa dakbayan gumikan kay kadaghanan kanila nadugta na ug miburot ang lawas tungod sa kadugay nga nahumol sa tubig.

Apan sa 49 ka mga patay’ng lawas unom kanila ang initial nang giila sa ilang mga kabanay pinaagi sa ilang mga tattoo, alahas, suot nga sinina ug mga ulat sa operasyon sa ilang lawas.

Ang mga patay’ng lawas diha gibutang sa Cosmopolitan Funeral Homes sa Junquera Street sa barangay Parian diin gipasulod ang mga kabanay aron tagsa-tagsaon nila og ila.

“Di naman mailhan oy, guba naman kaayo ang ilang hitsura,” usa sa mga naghilak nga kabanay’ng misusi apan napakyas sa gipangita.

Ang inisyal nga pag-ila sa mga patay’ng lawas anha himoan pa og validation sa National Bureau of Investigation forensics teams ug usa na niini mao ang pagkuha og sampol gikan sa giilang patay ug sampol gikan sa labing duol nga kabanay niini alang sa deoxyribonucleic acid (DNA) test.

Ang mga kabanay nagdala og mga porma nga diin ilang gisulat ang tanang ilhanan sa ilang mga paryenteng missing nga gipahimo sa DSWD aron mas mapadali ang pag-ila kanila.

Sa 49 ka patay’ng lawas 32 kanila mga lalaki, 14 ang babaye ug tulo ka bata. Kagahapon unom ang inisyal nga nailhan ug kini mao sila si Esmeralda Lequigan, Juvelyn Requilme, SPO3 Adolfo Villareal, Julie Mendoza, Roel Lariba ug Russel Bucag.

Ang maong mga lawas gikan sa nalunod nga MV Princess of the Stars sa Sulpicio Lines nga naugkat sa nagkadaiyang mga isla sa probinsya sa Romblon nga gidala sa MV Cebu Princess diha sa Pier 6 sulod sa tulo ka ten-footer van ug upat ka mga kahon.

Walay gitugutang kabanay nga makaanha sa maong pantalan kagahapon aron dili magkaguliyang ang operasyon hinungdan sa pagbutang og hugot nga seguridad sa Philippine Coast Guard, PNP, ug Maritime Police.

Ang mga patay gisagulan na og lime kon anapog aron dili manimaho samtang padayong gipasiritan og disinfectant ang mga lawas sa mga sakop sa quarantine aron di makamugna og sakit. Ang grupo ni Dr. Renato Bautista sa NBI nga gilangkuban sa mga dentista, chemist, fingerprint ug photographers maninguhang matabangan ang mga kabanay pag-ila kanila.

Si Ryan Bernard Go, ang Vice President for Deck Maintenance sa Sulpicio Lines nga diha sa pantalan kagahapon nihangyo sa mga kabanay sa mga biktima nga mokalma ug mokooperar sa pamaaging gipatuman.

 “We asked the relatives of the victims to be patient. As long as they have the proper documents we’ll release the bodies to them and we’ll take care of the families,” sumala pa niini. Uban sa report ni Rey Pasaporte (BANAT NEWS)