Usa ka tawo nga namutol og mga sanga sa kahoy sa tugkaran sa ilang balay natagak kay nakuryentihan didto sa sitio Gumamela, barangay Opao, Mandaue City niadtong Lunes sa hapon .
Ang biktima mao si Virgilio Barientos, 40, minyo, nga taga sitio Gumamela .
Si SPO1 Reynaldo Urot sa Opao Police Station nga nahinabi sa Banat News miingon nga nianang alas 2:00 pasado ang takna sa kahaponon gipamutol sa biktima ang mga sanga sa magtalisay nga mitabon na sa ilang balay.
Apan tungod sa kabasa sa lawas sa kahoy gumikan sa uwan, nga nasaghiran sa panit nga linya sa kuryente sa Visayan Electric Company (VECO) nakuryentihan ang biktima hinungdan nga nahagbong kini ug mikirig sa pagtugpa niya sa yuta.
Dali nga gidala ang biktima sa Mandaue City Hospital ug padayon pa kining giatiman hangtod karon sa mga doktor sa maong tambalanan.