Manag-uyab gipanigbas sa tawo

Padayon pang giobserbahan sa mga doktor ang duha ka managhigugmaay human kini mabiktima sa pagpanigbas ilawom sa 2nd Mactan-Mandaue Bridge sa barangay Pusok dakbayan sa Lapulapu sa milabay’ng gabii.

 Ang mga biktima giilang sila si Jerome Sumalinog, 18, residente sa barangay lungsod sa Cordova ug ang hinigugma niini nga usa ka 15-anyos nga katabang sa panimalay ug lumad sa Inabanga lalawigan sa Bohol.

 Sa imbestigasyon nga gihimo ni SPO2 Rolito Jumao-as ug PO1 Efren Lorico sa homicide section sa kapolisan sa Lapulapu nasayran nga samtang nag-date ang duha ilawom sa maong tulay, kalit lamang silang giduol sa wala mailhing tao nga nagbitbit og sundang ug gipanigbas sila niini.

 Human sa pagpanigbas daling misakay ang suspek sa usa ka bisekleta ang suspetsado ug daling misutoy palayo sa lugar. 

Ang duha nakaangkon og mga samad tinigbasan sa ulo ug bukton ug gidala sa Mactan Doctors Hospital.

 Samtang si SPO2 Jumao-as nagduda nga adunay kasuya o paregla lamang ang nahitabo gumikan kay sila mismo wala makaila sa maong tawo nga responsable.