50 estraktura demolison sa SPEED

Kapin sa 50 ka mga illegal structures ang gitakda nga pangbungkagon sa Squatters Prevention Encroachment and Elimination Division (SPEED) niining semanaha.

Kini maoy gipahibawo sa hepe sa SPEED nga si Vicente Mercado subay usab sa ilang pagpatuman sa demolition order nga nahadangat sa iyang buhatan.

Matud ni Mercado nga gitakda nilang demolison ugmang adlawa ang kapin sa 20 ka mga illegal structures sa 3rd street diha sa North Reclamation Area ning siyudad sa Sugbu.

Ang nahisgutang mga estraktura giingong nilapas na sa karsada ug nakahasol sa mga   motorista ug sa ubang mangagi sa maong dalan.

Gawas nga gihimong tindahan ang ubang mga illegal structures, niingon ang hepe sa SPEED nga gihimo na usab kining pinuy-anan.

Unya sa Biyernes, laing mga illegal structures na usab ang gitakdang panggub-on sa mga sakop sa demolition team sa dakbayan.

Niining higayuna, ang mga estraktura nga anaa gipangtukod daplin sa Mahiga creek paingon sa barangay Mabolo maoy i-demolish sa SPEED.

Nagkanayon si Mercado nga ang demolition order maoy agig paghawan usab sa 3 meter easement gikan sa sapa.

Kini ilabi na nga ang Cebu City Rivers Management Council nagtinguha nga mapatuman sa hingpit ang paghawan sa 3 meter easement sa kasapaan sa dakbayan.

Sumala ni Mercado nga ila nang napadalhan og notisya ang maapektahan sa demolisyon alang sa boluntaryo niining pagpahawa sa ilang nahimutangan.

Tungod niini niingon ang hepe sa SPEED nga wala nay rason nga mobabag pa ang mga hingtungdan sa ilang ipahigayon nga demolisyon.

Sa pikas bahin, subling gisusi sa mga sakop sa demolition team ang kontrobersyal nga “Let’s Morning the Night” diha sa barangay Kamagayan kagahapong adlawa.

Apan nasayran hinoon ni Mercado nga boluntaryong nanghipos ug nanira ang mga naninda diha sa maong kan-anan.