Army man misampak sa bus patay

Nabuak ang ulo ug namilit pa sa bumper sa bus pasaheroan ang pipila ka buhok niini sa usa ka sakop sa army nga gibanggaan sa gikasugat nga bus samtang sakay sa iyang motorsiklo paingon nga mo-duty sa highway sa barangay Don Pedro Rodriquez siyudad sa Bogo niadtong Domingo sa alas 9:10 sa gabii.

 Ang biktima nga patay diha-diha mao si PFC Sixto Caet III, 30 anyos, minyo ug lumad nga taga La Libertad, Negros Oriental ug kasamtangang nadestino sa 78th Infantry Battalion nga nagbase sa siyudad sa Danao.

Samtang ang drayber sa Rough Rider Bus mao si Richard Gapaz Gelig, 25, lumad nga taga Maranding, Lala, Lanao del Norte.

Matud ni PO1 Jerry dela Cruz, traffic investigator sa Bogo City Police dihang nahinabi sa Banat News gikan sa siyudad sa Sugbu ang bus paingon sa lungsod sa Daanbantayan.

Samtang ang biktima gikan sa San Remegio sakay sa iyang motorsiklong kolor itom paingon nga mo-duty sa siyudad sa Danao.

Subay sa inisyal nga imbestigasyon sa kapulisan nipugos og overtake sa gisundan nga sakyanan ang bus apan sa pagkawat niini sa pikas linya wala mabantayi niini ang gikasugat nga motorsiklo.

Maayong pagkasungag sa motorsiklo nga nakaingon sa pagkadaro ug pagkaguroy niini og sobra sa 10 metros nga niresulta sa pagkagupok gupok niini ilawom sa bus.

Samtang ang biktima nga sakop sa army maayo sab nga pagkabunal ug nadahik pa sa semento ang ulo niini hinungdan sa hinanali niining kamatayon ug wala na madala pa sa tambalanan.

Human sa hitabo boluntaryong nitahan sa kapulisan ang drayber sa bus ug nagpaabot sa tukmang sumbong nga ipasaka batok kaniya.