SuperFerry 12 nasaghid sa laing barko

Way kadaot nga namugna sa duha ka barkong Super Ferry 12 ug MV Princess of the South human ang nahauna aksidenteng nakasaghid sa naulahi nga nakaangkorahe diha sa pantalan kagahapon sa buntag.

Ang Superferry 12 padulong nang molawig ug kasamtangang nagguroy sa iyang angkla pasaka dihang nasangit kini ngadto sa barkong MV Princess of the South nga gikatakdang molarga para sa Cagayan kagabii.

Sa gipadalang pamahayag sa Super Ferry gikan sa vice president for Safety and Security Jess Supan nalangay lang og pipila ka oras ang pagbiyahe sa ilang barko apan nakapadayon kini sa biyahe niana nang alas 12:45 sa hapon pangadto sa Cagayan.

Giklaro usab niini nga luwas ang tanang mga pasahero sa maong barko ug gipasalig nga bisan sa pagka-delay sa biyahe ilang paningkamutan nga maabot sila sa ensakto nga unang naka-schedule nga oras.

 Samtang si Captain Nestor Ponteres, Port Captain sa Sulpicio Lines mibutyag usab nga way dakong kadaot nga namugna sa Princess of the South ang maong insidente ug nakapadayon sa paglarga ang ilang barko paingon usab sa Cagayan.

Nakaangkon lang og walo ka pulgadang buslot ug garas sa pintal diha sa fore castle sa barko ang pagsaghid ug di makaapekto sa integridad sa tibuok barko.

Gikatahong kusog nga hain ang nakaingon sa aksidente.