Mag-atubang pa og problema ang tinguha ni Cebu City South District Congressman Antonio Cuenco pagbuwag sa sitio Banawa ug Englis gikan sa barangay Guadalupe bisan pa man kung niuyon na ang konseho sa dakbayan nga moamendar sa ordinansa nga alang sa maong katuyoan.
Matud ni Bise Mayor Michael Rama nga nagkaestorya na sila ni Cuenco labot sa tinguha niini ug wala silay problema sa City Council gawas nalang kang Mayor Tomas Osmeña.
Gitahasan na ni Rama si konsehal Richie Osmeña nga maoy mopalabang sa amendatory ordinance nga magtakda unya sa plebisito.
Niining tungura, giangkon ni Rama nga mag-atubang gihapon og problema ang pagpalabang unya sa amendatory ordinance kung dili mokooperar ang mayor.
Nasayran nga nanginahanglan og usa ka gatos ka libo ka pesos ang pagpahigayon sa plebisito ug kini giingong nanginahanglan sa pagtugot sa mayor.
“Kanang appropriation gud gikan man na sa executive, igo ra mi sa konseho pag-aprubar ana, mao nga kinahanglan gyud na nga estoryahon,” sumala ni Rama.
Niingon si Rama nga kung dili mogahin og pundo ang city government alang sa pagpahigayon sa plebisito iyang itugyan ngadto kang Cuenco ang paggahin niini.