Upat ka kalabirang ulo ug imahen sa Santos gisud sa sako

Upat ka mga kalabirang ulo sa tawo ingon man ubang mga parte sa bukog nga gituohang iya gihapon sa tawo ang nakit-an sa usa ka manangite mga alas 3:00 pasado sa hapon niadtong Sabado diha sa bukirang bahin sa barangay Malolos lungsod sa Barili.

Si Rex Dela Cerna taga barangay Bogo, Aloguinsan giingong nananggot niadtong higayona sa kalubihan ni Fortunato “Porting” Fanilon diha sa nahisgutang dapit maoy nakakita niini ug nitaho sa awtoridad.

Sila si SPO3 Andres Alpas ug mga kaubanan maoy nisusi sa dapit kuyog ang kagawad sa barangay ug si Dela Cerna nga gibana-banang 15 ka kilometros ang gilay-on gikan sa Poblacion.

Si Dela Cerna nitug-an sa mga polis nga samtang siya nisaka sa lubi nga iyang gisanggotan may nakit-an siya sa kalibunan nga sako.

Dali siyang mikanaog ug gisusi ang sulod sa maong sako ug mao nalay iyang kakurat nga sa iyang pag-abli niini upat ka mga kalabirang ulo ang sulod niini.

Sumala pa sa mga polis uban sa mga bukog ang rosaryohan ug imahen ni Sr. Sto. Niño ug Sr. San Agustin.

Dunay pagduda ang kapolisan sa Barili nga binuhatan sa “kulto” tungod kay nakadawat sila og report nga dunay daghang tinuohan sama sa mga “kulto” diha sa kasikbit nga barangay hangtud na sa Aloguinsan.

Matud pa ni PO3 Demsun Aldemita nga nahinabi sa Banat News wala hinuoy tawong na-report nga na-missing sa maong barangay apan ilaha pang ipasusi sa PNP Crime Laboratory ang mga bukog.