Talisay traffic nangandam

CEBU - Gipangandaman na karon pang daan ang kahapsay sa trapiko sa kadalanan sa Talisay City sa umaabot nga Inasal Festival sa Oktobre 15, 2008.

Ang luyo-luyong tsirman sa Talisay City Traffic Commission nga si Konsehal Sabeniano Abatayo mibutyag sa Banat News nga giandam na nila ang mga signage ug blockage alang unya sa mahitabong re-routing sa mga sakyanan.

Gawas niini higpitan usab nila ang mga vendors tungod kay mao kini kasagarang makabara sa agianan sa mga sakyanan.

Gani may pasidaan na si Abatayo nga kutob sa mga vendors nga walay permit, dili nila kini tugotang makapaninda sa mga sidewalk.

Midugang si Abatayo nga ang mga vendors usahay ang maghatag og labad sa ulo sa mga drayber ug sa mga traffic enforcers ilabi na sa panahon sa piyesta.

Kini tungod kay bisan asa lang sila moladlad sa ilang mga baligya nga maoy makahuot sa daan nang huot nga karsada.

Matud pa ni Abatayo nga dili na siya gusto nga masubli pa gihapon ang mga suliran bahin sa trapiko sa mga piyestang nanglabay diha sa Talisay nga gumikan sa kakuwang sa sistema naghatag og dakong problema sa dagan sa trapiko ilabina diha sa barangay Tabunok. – BANAT NEWS