Drayber gidunggab

CEBU - Usa ka drayber sa traysikad kinsa giingong wala mobayad sa iyang utang, gidunggab sa iyang giutangan didto sa barangay Ocaña siyudad sa Carcar niadtong Sabado sa alas 5:00 sa hapon.

Ang biktima mao si Narciso Abadilla, 49, biyudo, nga taga Ocaña, samtang ang suspek mao ang usa ka Joseph Amay Nacua, hingkod ug silingan ra sa biktima.

Matud ni PO2 Democrito Alcover sa Carcar City Police station nga nahinabi sa Banat News nga ang biktima gikan sa boundary sa barangay Ocaña ug lungsod sa Sibonga ug paghiabot niini sa Ocaña proper didto kini lubaa sa suspek.

Unang gitaopan sa kutsilyo mao ang bukton sa biktima apan giusban kini ug maayong pagkatuhab sa walang bahin sa iyang lawas.

Nasayran gikan sa kapolisan nga ang biktima ug ang suspek dugay nang nagkabangi  tungod sa utang sa nahauna nga wala kabayri.

Ang ilang bangi naggumikan sa ilang sugal nga tong-its diin matud pa wala mobayad ang biktima dihang naningil kaniya ang suspek.

Ang dinaliang pagresponde sa kapolisan nga gipangulohan nila ni SPO1 Alden Abay Abay, PO3 Paulino Sanchez ug PO1 Renido Villaraiz maoy nakasalbar sa biktima kay mikaratel dayon og dagan ang suspek nga wala katiwasi ang biktima dihang nahiabot ang kapolisan.

Gihatod dayon sa mga otoridad ngadto sa Jesus Paras Memorial District Hospital.

Samtang ang misibat nga suspek gipangita pa karon sa kapolisan. – BANAT NEWS