Nakadasmag patay

CEBU - Namatay ang usa ka tawo kinsa human makadasmag og laing tawo, midasmag usab sa laing sakyanan nga iyang gikasugat alas 6:00 pasado ang takna sa miaging gabii sa dalan A.S. Fortuna, barangay Banilad, dakbayan sa Mandaue.

Ang namatay mao si Richard Yayong Senining, 38 , ulitawo, nga taga barangay Canjulao, dakbayan sa Lapulapu.

Si Rio Clitago Encavo, 32, nga taga barangay Subangdaku sa maong dakbayan maoy nagmaneho sa Mitsubishi multicab nga gidasmagan sa motorsiklo sa biktima.

Sa pakighinabi sa Banat News kang SPO2 Eleazar Saromines, imbestigador sa traffic section sa Mandaue City Police Office (MCPO) nasayran nga nagdagan subay sa dalan M.L. Quezon sa Maguikay paingon sa flyover ang multicab nga gimaneho ni Encavo.

Apan samtang nagdagan kining multicab, ang nagdangdanga nga motorsiklo nga gimaneho sa biktima nakasaghid og tawo nga nagbarog sa karsada. Samtang misaliring ang tawong wala hiilhi, mibaliwliw usab ang motorsiklo ug didto kini modusmog sa multicab ni Encavo.

Matud pa ni SPO2 Saromines nga gumikan sa kakusog nga pagkadasmag, nalagpot ang biktima ug sa pagtugpa niini sa sementadong karsada wala na makabangon.

Gidali kini paghatod ngadto sa   Mandaue City District Hospital apan gideklarar kini nga dead on arrival.

Samtang ang wala hiilhing lalake nga gidasmagan sa biktimang namatay, naa usab sa talandugong kahimtang sulod sa mao gihapong tambalanan.

Matud pa ni Saromines nga si Encavo temporaryo nilang gitanggong karon sa detention cell sa Presinto 5 sa Opao Police Station alang sa tukmang lakang nga ilang pagahimoon niini. – BANAT NEWS