Karapatan 'bakakon' - Centcom

CEBU - Isugal ni Central Command Commanding Officer Lt. Gen. Pedro Ike Inserto ang iyang usa ka tuig nga suweldo kini kun mapamatud-an sa Karapatan-Central Visayas nga gi-harass sa military ang mga residente sa barangay Nagbinlod, Santa Catalina, Negros Oriental.

Ang maong pundok mipasangil nga gibombahan sa militar ang maong dapit ug mipadala og mga sundalo hinungdan nga nanglayas ang mga residente.

Matud pa ni Inserto, ang tinuuray’ng nahitabo, mga sakop sa New People’s Army di mga barangay ang gibombahan og howitzers sa militar kundili mga kampo sa NPA.

Sumala pa niya walay mga civilian nga naapektuhan tungod kay ang maong dapit kalasangan ug walay mga residente sa maong lugar ug bugtong nagtikaw-tikaw sa maong dapit mga rebeldeng NPA.

Matud pa niya pagmatuod niini mao nga human sa artillery barrage duna pay sinukliay sa bala tali sa ground forces sa militar ingon man NPA diha sa maong lugar ug hangtud karon nagpadayon ang paggukod sa mga sakop sa 19TH IB sa mga rebelde diha sa maong lugar.

Samtang giklaro niini nga ang mayor sa nahisgutang lugar nisuporta usab sa kampanya karon sa gobiyerno aron puhagon ang kampo sa mga NPA diha sa maong dapit.

Gihulagway niini nga 100% nga pamakak ug pamasangil ra ang gihimo sa Karapatan nga gihulagway ni Inserto nga nagtakuban ug nagpakaaron-ingnong nanalipod sa tawhanong katungod sa mga residente tungod kay lasang ug awaaw ang ilang gipangangkong dapit ug kampo gyud kini sa mga NPA.

“I bet my one year salary, I will donate to Karapatan if they can proved it,” hagit pang Inserto.

Usa sa magpamatuod nga walay nahitabong harassment sa militar mao ang insidente niadtong nilabay’ng semana diin mokabat sa 100 ka mga residente sa nahisgutang lugar ang nibabag sa mga sakop sa Karapatan gikan sa Sugbu pagsulod sa ilang lugar.

Ang mga sakop sa Karapatan nangangkong sila miadto sa maong dapit aron imbestigahan ang mga human rights violations sa militar apan ang gihimo sa maong grupo nangabulgar na hinoon sa mga rebelde inay ngadto sa mga gilupigan.

Gikuwestyon usab ni Inserto ang Karapatan nga kung tinuuray silang tigpanalipod sa tawhanong katungod nganong wala sila mosuporta sa kapin 30 ka mga mag-uumang biktima sa extortion, murder ug pagpangawat diha sa Samar nga mipasaka og kaso batok sa mga rebeldeng NPA. – BANAT NEWS