CEBU - Usa ka lalaking nangabubho tungod kay di siya ang giminyoan sa iyang kanhi uyab nanimalos sa lalaking maoy naminyoan sa babayeng misalikway kaniya.
Kini nahitabo diha sa bukirang bahin sa barangay Tupas sa lungsod sa Ronda niadtong Sabado sa alas 8:40 sa gabii.
Ang suspek nga nadakpan sa kapulisan kagahapon sa alas 6:00 pasado sa buntag giilang si Glenn Gelasque, molupyo sa sitio Ilithon barangay Magtubo sakop sa maong lungsod.
Samtang ang biktima mao si Alejandro Tijas alyas Itok, ig-agaw sa nabana sa kanhi uyab sa suspek ug maoy naigo dihang iyahang gipusil ang karibal nga si Daniel Landiza pulos mga molupyo sa nahisgutang lugar.
Matud ni PO1 Josephus Faunillan sa Ronda Police dihang nahinabi sa Banat News ang tuyo gyud sa suspek mao si Landiza apan ang naigo niini pagpaulan og bala mao si Tijas.
Ang duha gikatahong nanglakaw gikan sa balay sa ilang higala ug padulong na nga mopauli.
Sa pag-abot nila sa tungod sa usa ka balay nga gipanag-iya ug nailhan lang sa pangalan nga “Julie” nakadungog sila og paka sa buto sa armas apan wala lang nila kini panumbalinga sa pagtuong di sila maoy gituyoan og pusil.
Paghiabot nila sa unahan laing tulo ka sunod-sunod nga buto sa armas ang ilang nabati ug sa ilang paglingi maoy nakit-an ni Landiza si Gelasque nga naggunit ug nagtion og armas kanila.
Diha-diha kalit nga nalup-og si Tijas ug diha nalang mahibaw-ing naigo na kini sa buko-buko samtang ang suspek daling midagan palayo sa lugar.
Si Tijas daling gidala ngadto sa tambalanan dinhi sa dakbayan sa Sugbu ug gitug-an ang nahitabo ngadto sa kapolisan.
Nadakpan usab dayon ang suspek kagahapon sa gihimong hot pursuit operation sa kapolisan.
Matud ni PO1 Faunillan miangkon ang suspek nga nangabubho kini tungod kay ang karibal niyang si Landiza maoy giminyoan sa iyang kanhi uyab ug buot niya kining panimaslan.
Ang kapulisan padayun pa sa ilang imbestigasyon pagtugkad gyud sa tinuoray'ng motibo sa suspek pagpusil sa duha samtang giandam na ang kasong ipasaka batok kaniya. – BANAT NEWS