Gipusil sa giutangan

CEBU – Usa patay ug laing usa ang kritikal ang kahimtang human sa managlahing pagpamusil diha sa dakbayan sa Talisay niadtong Biyernes sa gabii.

Usa sa mga biktima gikatahong wala mobayad sa iyang utang ngadto sa suspetsado hinungdan nga kini gipusil ug giilang si Joey Resuena, taga sitio Laguna, barangay Biasong, dakbayan sa Talisay.

Samtang gitumbok nga mipusil kaniya mao ang naila lang sa ngalan nga “Berto” alas 9:15 sa gabii diha sa sitio Mananga, barangay Tabunok.

Base sa imbestigasyon sa kapolisan sa dakbayan ang suspek uban sa mga higalang giila lang usab sa ngalan nga “Dodo” ug “Judy” nga nag-inom diha atubangan sa balay ni Milo Zabate.

Samtang si Resuena nagtan-aw og telebisyon diha sa gawas sa balay ni Zabate giduol kini sa suspek ug gisingil sa utang niini nga giingong dugay nang wala mabayri.

Apan gikatahong way ikahatag ang biktima niadtong tungura hinungdan nga gikasuko kini sa suspek ug gisukmag ang biktima hinungdan nga kini midagan sa taas sa terasa sa balay ni Zabate.

Si Zabate maoy mikomprontase sa suspek apan wala kini panumbalinga sa naulahi ug nipadayon og inom uban sa mga barkada.

Apan pila ka minuto ang milabay kalit lang dunay buto sa pusil ang nadungog ug si Resuena kalit lang nahagba diha sa sulod sa balay ni Zabate ug may igo sa pinusilan diha sa tuong kilid.

Si Berto ug ang duha ka higala niini ang daling mibiya sa lugar.

Sa laing bahin, kritikal ang kahimtang sa usa ka 21-anyos nga lalaki human kini pusila sa wala mailhing tawo diha sa sitio Kimba, barangay Cansojong sa nahisgutang dakbayan.

Ang biktima giila sa mga polis nga si Romeo Peña Flor, taga sitio Kimba, Bravo sa nahisgutang barangay kinsa nakaangkon og usa ka samad pinusilan sa tuong bahin sa liog ang daling gidala sa Talisay City District Hospital apan tungod sa kahimtang niini gibalhin sa Vicente Sotto Memorial Medical Center.

Base sa pasiunang imbestigasyon sa mga polis nga si Peña Flor trabahador sa usa ka carwash sa nahisgutang lugar gikan nag- uban sa mga kauban sa trabaho nag-inom diha sa duol nga videoke bar.

Atol sa ilang pag-uli usa ka wala mailhing tawo ang miatang kanila ug kalit nga mipusil sa biktima. – BANAT NEWS