CEBU – Gikalipay sa Archdiocese of Cebu ang gilusad niining signature campaign batok sa Reproductive Health Bill nga gisugdan na paglantugi didto sa kongreso.
Matud sa tigpamaba sa Archbishop Palace nga si Msgr. Achilles Dakay nga positibo ang resulta sa ilang gihimo nga kampanya ug nakadawat na og mga tawag gikan sa nagkadaiyang parokya sa Sugbu nga daghan ang nisanong sa ilang kampanya.
Niingon si Dakay nga ubay-ubay sa mga parokyano ang nagpakabana ug nipirma batok sa pagpalabang sa Reproductive Health Bill.
Wala pa hinuon masayod si Dakay kung pila na ka pirma ang ilang nahipos sukad gisugdan ang kampanya niadtong miaging semana.
Apan malaumon kining makuha ang ilang target nga mga signature sa mosunod nga mga adlaw.
Ang Archdiocese of Cebu nagtinguha nga makahipos og usa ka milyon ka pirma gikan sa mga parokyano sa 142 ka mga parokya ug ipadala ngadto sa kongreso aron sa pagmatuod nga daghan ang wala makauyon ug supak nga mapalabang ang kontrobersyal nga balaudnon.
Una nang gipadayag ni Dakay nga ang simbahan supak sa Reproductive Health Bill tungod kay kini giingong nasukwahi sa pagtulun-an sa simbahan.
Ang balaudnon mag-promote sa paggamit og mga contraceptives sama sa condom ug uban pa, gawas nga kini gihulagway sa simbahan nga pro-abortion.
Kusganon hinuon kining gihimakak sa mga proponent nga sila si kongresista Edcel Lagman ug kongresista Janette Garin ang kahadlok ug pangagpas sa simbahan ug mipasabot nga pro-life ug nagduso sa maayong kalidad sa kinabuhi ang maong balaudnon.
Ang Reproductive Health Bill nila ni Lagman ug Garin gisuportahan sa laing relihiyon sa nasod nga mao ang Iglesia ni Cristo. – BANAT NEWS