'Pusher' nisukol napatay

CEBU – Gitagod-tagod sa mga bala sa kapulisan ang lawas sa usa ka gituohang drug pusher diha sa sitio Cabancalan 1 barangay Bulacao ning dakbayan kagahapon sa alas 4:45 sa kaadlawon.

Ang dead-on-arrival sa Cebu City Medical Center (CCMC) giila sa kapulisan nga si Judy Sambroso nagpuyo sa nahisgutang dapit human makaangkon og samad pinusilan sa iyang dughan, tiil, paa, ug uban pa.

Sayo kagahapon sa buntag ang mga elemento sa Pardo Police Station ni-serve sa search warrant sa panimalay ni Sambroso nga giisyu ni RTC 17 Judge Silvestre Maamo Jr. gumikan sa kalambigitan niini sa pagpamaligya niini og illegal drugs.

Ang maong pagpang-ronda gipanguluhan mismo sa ilang hepe nga si Police Chief Inspector Aureo Sanchez apan giingong misukol ang suspek ug nahitabo ang sinukliay sa bala.

Si Sanchez nga gikahinabi sa Banat News nagkanayon legitimate ang ilang operasyon ug igo lang silang nanalipod sa ilang kaugalingon dihang gi-unahan sa pagpusil sa biktimang si Sambroso.

Matud pa niini nga uban siya sa 12 niya ka personnel ingon man back-up sa Mobile Patrol Group dihang gituktok nila ang pultahan sa panimalay ni Sambroso apan wala sila ablihi niini hinungdan nga ilang giguba ang pultahan apan sa pagsulod nila kalit silang gipusil sa suspek.

Sumala pa niini nga gisiguro niya nga aduna silay mga back-up gumikan kay base sa impormasyon nanganti na ang suspek nga di gyud kini padakop og buhi ug mosukol kini.

Si PO1 Diosdado Parejas Jr. kinsa maoy usa sa misulod gikatahong hapit maigo samtang si PO1 Henry Abatayo dali usab kaayong naka-return fire ingon man ang ubang mga polis.

Gitataw ni Sanchez nga ngitngit gyud kaayo ang maong dapit ug ang naghatag nilag suga mao lang ang flash light nga ilang gigamit sa operation.

Nakuha sa kapulisan sa crime scene ang usa ka .45 kalibre uban sa duha ka mga magazine niini, unom ka buhing bala sa .38, 79 ka mga nilikit nga marijuana, cellphone, usa ka kabhang sa .22 mga kagamitan sa paggamit niini, mga binandol nga papel ug P116 nga cash.

Samtang ang inahan niini nga si Theresa nga gikahinabi sa Dyss Super Radyo niakusar nga gi-ransack sa mga police ang panimalay sa iyang anak.

Matud pa niini nga dili layo ang iyang panimalay sa gipuy-an sa iyang anak ug iyang nakita ang mga police nga nipaarak sa ilang tag-as nga armas ngadto sa panimalay sa iyang anak.

Gipadayag niini nga naghigda na ang iyang anak niadtong tungura uban sa iyang asawang mabdos uban sa duha ka mga anak ug wala kini mosukol sukwahi sa pangangkon sa kapulisan.

Gitataw usab niini nga nakadaog ang iyang anak sa lotto hinungdan nga nakapaayo kini sa ilang panimalay.

Nunot niini mosang-at sila’g kaso ngadto na sa Commission on Human Rights (CHR) gumikan kay mismo ang ilang pag-umangkon nakakita nga wala mosukol ang suspek.

Matud pa niya walay criminal record ang iyang anak, apan ang kapuyo ni Sambroso nga si Mylene Formentera, 25, nga gikahinabi gihapon sa maong sibyaanan miangkong panagsang mamaligya gyud og marijuana ang suspek.

Dugang pang Formentera nakadungog siya’g tuktok sa pultahan ug iyaha kining gitubag apan walay nitingog diha sa gawas, nakugang nalang siya nga nagbuto-buto dayon ang armas.

Matud pa niya wala siya makadungog og buto sa armas gikan sa sulod sa ilang lawak kundili pulos ra gikan sa gawas diin ang mga polis mipwesto.

Giangkon niini nga ang .38 nga armas iya sa kapuyo apan ang .45 dili ilaha.

Samtang misukwahi sa pamahayag sa inahan sa suspek si Mylene kabahin sa pagdaog niini sa lotto ug miklarong wala kini makadaog og lotto kundili nakadawat lang sila sa ilang dawat-dawat.

Si Sanchez mitug-an nga dili over kill ang nahitabong nakasabot sa sitwasyon sa kabanay ug mipadayag nga katungod usab nila nga moreklamo subay sa ilang baruganan.

“Kabahin naman gud ni sa atong trabaho sa pagpamulis nga adunay moreklamo atubangon nalang ni namo, ang ako lang nga legitimate to nga operations,” sumala pa ni Sanchez. – BANAT NEWS