R-lane sa Osm. Blvd. sirad-an

CEBU - Sirad-an sugod sa alas 5:00 sa buntag ugmang adlawa ang tuong bahin (right lane) sa Osmeña Boulevard gikan sa Kapitolyo paingon sa dalan Sanciangko ug ang ubang bahin sa Osmeña Boulevard.

Kini tungod usab sa ipahigayong “Alay Lakad Parade 2008” nga manukad sa Capitol ground ug Plaza Independencia ug mag-abot sa Cebu City Sports Center

Ang nahisgutang kalihukan gipaabot nga salmutan sa nagkadaiyang sektor nga naglakip sa mga tinun-an sa nagkadaiyang tunghaan sa dakbayan.

Tungod niini usa ka traffic rerouting ang ipatuman sa Cebu City Traffic Group ingon man sa City Traffic Operations and Management (Citom).

Kapin sa 50 ka mga rota sa mga jeep de pasaheroan ang maapektahan unya sa ipatuman nga traffic rerouting.

Partikular na niini kadtong mga puj ug ubang pribadong mga sakyanan nga mag-agian diha sa Osmeña Boulevard ning siyudad.

Subay niini gipahimangnoan sa Traffic Group ug Citom ang mga motorista nga musunod lang sa mga traffic sign nga ipakatap sa kadalanan.

Kini aron dili usab makahatag og kahasol sa ubang mga road user nga nagdali paingon sa ilang tagsa-tagsa ka destinasyon.

Ang Alay Lakad karong tuiga nagdala sa tema nga “Kagalingan ng Kabataan, Responsibilidad ng Bayan,” nga gipasiugdahan sa Department of Social Welfare and Development (DSWD) sukad pa niadtong dekada 70.

Tumong niini nga makakuha og pundo ang maong ahensya nga magasto sa gipasiugdahang mga programa alang sa mga out-of-school youth.

Sa kasamtangan, mokapin na sa usa ka libo ka mga batan-on sa siyudad ang nakapahimulos sa pundo nga nakolekta sa Alay Lakad.

Kini pinaagi usab sa scholarship grants, vocational skills training, leadership seminar, scouting, basic business management ug livelihood activities.

Ang mga scholars sa Alay Lakad anaa gibansay-bansay sa Technical Education and Skills Development Authority (TESDA) ug sa Department of Manpower Development and Placement (DMDP) sa Cebu City Hall.   (BANAT NEWS)