Anak sa kapitan nanunggab

Usa ka anak sa kapitan sa barangay ning dakbayan sa Sugbu ang nanunggab og waiter kay nasuko kining gisingil sa ilang giinom nga alak diha sa usa ka bar sa mga dalan Sanciangko ug Pelaez St,. ning dakbayan. kagahapon sa alas 3:00 sa kaadlawon.

Ang suspetsado giila sa kapolisan nga si Allan Masecampo Jr, 25, ulitawo, taga Junquera St., sa barangay San Antonio ug giingong anak ni Kapitan Allan Masecampo Sr. sa maong barangay.

May barkada usab kining nailhan nga si Junel Francis Gregorio, 28, ulitawo, walay trabaho ug silingan ra ni Masecampo.  

Ang nadunggaban nga waiter kansang bukobuko gitaupan sa kutsilyo nailhan usab nga si Jerry Agustin Jr. 27, waiter sa RAJ bikini bar sa Sanciangko.

Si SPO2 Rey Cuyos sa Homicide Section sa Cebu City Police Office mibutyag nga   gipaninglan sa biktima ang suspetsado sa ilang bayranan sa bino nga ilang gilala apan imbis mobayad, kutsilyo hinooy gihansak ngadto sa waiter.

Human taupi sa kutsilyo ang biktima mikaratel og panagan sila si Masecampo ug si Gregorio, apan nasugatan kini sa mga barangay tanod nga nag-roving.

Matud pa sa kapolisan nga mao usab kini gihimo ni Masecampo niadtong miaging gabii nga wala gihapon kini mobayad sa gilala niyang bino kay nagsalig nga siya usa ka anak og kapitan sa barangay.

Hinuon nagtingkagol na kini karon sa prisohan samtang gidala ngadto sa Cebu City Medical Center ang biktima aron matambalan.