Tomas wa magtagad sa award

Wala na mohatag og igong pagtagad si Mayor Tomas Osmeña sa laing pasidungog nga naangkon sa siyudad sa Sugbu bisan mao ra kini ang bugtong local government unit dinhi sa tunga-tungang Kabisay-an nga nahatagan sa PASADA award niining tuiga.

Ang PASADA kon Public Service Delivery Audit Award maoy pasidungog nga ihatag sa Civil Service Commission (CSC) alang sa maayong pagserbisyo.

Partikular na sa natad sa transparency sa transaksyon ingon man ang dali nga paghatag og impormasyon ug ang pagmentinar sa client-friendly environment.

Apan matod sa mayor labihang daghana na sa pasidungog nga nadawat sa iyang administrasyon ug dili na niya maihap.

“I stop counting the awards because we have so many awards and I don’t even bother to put it in the newspaper or anything,” sumala ni Osmeña.

Gitataw hinuon sa mayor nga ang labing mahinungdanon kaniya nga award mao ang pagsalig nga gihatag kaniya sa mga Sugbuanon.

“What is important is the award we get where it counts and that’s the vote of the people for us during elections, that’s the best award,” nagkanayon si Osmeña.

Lakip sa gihatagan og pasidungog sa CSC mao ang Pag-ibig Fund, Social Security System (SSS) ug ang Metropolitan Cebu Water District (MCWD).

Nasayran nga walay kasayuran ang mga ahensya sa pagpahigayon og evaluation sa CSC alang sa paghatag sa nahisgutang award.

Kini maoy kabahin sa lakang sa CSC pagpahinumdom sa mga buhatan ug ahensya sa gobiyerno sa ilang responsibilidad isip service provider.