Gipusil angol

Na-angol ang usa ka ulitawo human mapusili didto sa Sitio Sandayong,Upper Lipata lungsod sa Minglanilla niadtong Miyerkules sa alas 10:30 sa buntag.

Ang biktima mao si Ryan Dela Calzada, 19, ulitawo ,nga taga   barangay Tulay, Minglanilla, samtang ang suspek mao si Wilfredo Aldohiza, 53, minyo ug silingan ra sa biktima.

Si PO1 Jade Abrica sa Minglanilla Police Station mibutyag sa Banat News nga nagkalalis ang suspek ug ang amigo sa biktima nga si Edgar Risma Jr, hingkod, nga ila ra gihapong silingan.

Pulos wala kaantos sa babaay, gigamit na ang ilang mga kumo ug nagsinumbagay, pero gilupig ang suspek.

Gumikan sa kalagot sa naulahi, gilanit niini ang gitangkil niyang armas, apan si Risma nga nakabantay mikabad og dagan pahilayo ug mitipon sa daghang tawo nga nagpundok didto sa unahan.

 Gipabuthan lang gihapon kini sa suspetsado sa pamasin nga maigo, apan napakyas siya, kay ang bala didto motaroy sa paa sa biktima.

Gidali paghatod ngadto sa Minglanilla District Hospital ang biktima aron patambalan.

Samtang ang suspek nakasibat dayon ug hangtod sa paghimo ning balita padayon pang gipangita sa kapulisan.