Gisaulog sa mga sakop sa Labogon Operator’s and Tricycle Driver’s Association (LOTRIDA) ang ilang ika-13 ka tuig nga kasumaran sa pagkahimugso sa ilang kahugpongan kagahapon.
Si Jaime Serillano nga maoy presidente sa maong kahugpongan maoy nangulo sa gatusan niya ka mga sakop sa pagpasiugda sa nagkadaiyang kalihokan.
Kini maoy tinuig nga kalihokan sa maong kahugpongan nga gitumong alang sa paghatag pa og dugang kalig-on pinaagi sa pagpakighiusa sa maong kasaulogan uban sa ilang sakop sa pamilya.
Si Virgilio Suson nga maoy presidente sa Federation of Mandaue Operator’s and Tricycle Driver's Organization (FOMOTRIDO) nga nahinabi sa Banat News miingon nga ang LOTRIDA maoy usa sa 13 ka mga kahugpongan nga sakop sa ilang pederasyon.
Dugang pa niya nga ang LOTRIDA nga kahugpongan maoy mga traysikol nga nagbiyahian sa barangay Labogon, Paknaan, Basak ug paingon sa merkado publiko sa barangay Centro.
Ang mga nag-una sa ilang gipasiugdahang kalihokan nga gisugdan sayo pa sa buntag kagahapon mao ang motorkada nga nanukad sa barangay Labogon paingon sa simbahan sa Santo Niño sa barangay Paknaan.
Si Father Antonio Zamora nga maoy kura paruko sa Paknaan Parish Church mihatag usab kanila og panalangin uban ang pangindahay sa Labaw’ng Makagagahom ug hatagan sila kanunay og maayong lawas aron makapadayon sila pagserbisyo sa ilang mga sumasakay.